പേരൂര്‍ക്കട: നിരവധി ക്രിമിനല്‍കേസുകളിലെ പ്രതി പൊലിസ് പിടിയില്‍. കൊടുങ്ങാനൂര്‍ മണ്ണപ്പുറം കെ.എം.ആര്‍.എ- 40 സജിതാ നിവാസില്‍ കള്ളന്‍ സുരേഷ് എന്നുവിളിക്കുന്ന സുരേഷ്‌കുമാര്‍ (32) ആണ് പിടിയിലായത്.
വട്ടിയൂര്‍ക്കാവ് സര്‍വീസ് സഹകരണബാങ്കിനു സമീപം സുഗതന്‍ എന്നയാളെ വെട്ടിപ്പരുക്കേല്‍പ്പിച്ച കേസില്‍ ഇയാള്‍ പ്രതിയാണ്. വട്ടിയൂര്‍ക്കാവ് ഇലിപ്പോട് സൗഹൃദാ റസി. അസോസിയേഷന്‍ പരിധിയില്‍ ഷാന്‍വില്ലയില്‍ കാര്‍പോര്‍ച്ചില്‍ ചന്ദനത്തടി കൊണ്ടുവച്ച് വീട്ടുകാരെ കുടുക്കാന്‍ ശ്രമിച്ചകേസിലും വട്ടിയൂര്‍ക്കാവ് സ്റ്റേഷനില്‍ സൂക്ഷിച്ചിരുന്ന ടിപ്പര്‍ലോറി മോഷ്ടിച്ച കേസിലും ഇയാള്‍ ഉള്‍പ്പെട്ടിട്ടുണ്ട്.
തിരുവല്ലം സ്റ്റേഷന്‍ പരിധിയില്‍ സന്തോഷ് എന്നയാളെ വെട്ടിപ്പരുക്കേല്‍പ്പിച്ച കേസിലെയും പ്രതിയാണ് സുരേഷ്. പട്രോളിങിനിടെ പൊലിസിനെക്കണ്ട് ഓടിരക്ഷപ്പെടാന്‍ ശ്രമിച്ച പ്രതിയെ എസ്.ഐ അനൂപ് ചന്ദ്രനും സി.പി.ഒമാരായ അജയ്‌ശേഖര്‍, മഹേഷ് എന്നിവരും ചേര്‍ന്നാണ് പിടികൂടിയത്. ചന്ദനക്കേസില്‍ പ്രതിയായ സുരേഷിനെ വനംവകുപ്പിന് കൈമാറുമെന്ന് വട്ടിയൂര്‍ക്കാവ് പൊലിസ് അറിയിച്ചു.