വളാഞ്ചേരി: നാല് പെണ്‍മക്കളെ പീഡിപ്പിച്ച പിതാവ് അറസ്റ്റില്‍. വളാഞ്ചേരി എടയൂരില്‍ വാടക വീട്ടില്‍ താമസിക്കുന്ന തിരുവനന്തപുരം സ്വദേശിയായ 47കാരനെതിരേയാണ് വളാഞ്ചേരി സി.ഐ മനോഹരനും സംഘവും പോക്‌സോ വകുപ്പ് ചുമത്തി അറസ്റ്റു ചെയ്തത്. 17, 15, 13, 10 വയസുള്ള പെണ്‍കുട്ടികളാണ് പീഡനത്തിനിരയായത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
കൗണ്‍സലിങ്ങിനിടെ 10 വയസുകാരി സ്‌കൂളിലെ അധ്യാപികയോട് പറഞ്ഞപ്പോഴാണ് സംഭവം പുറത്തറിഞ്ഞത്. ഇതോടെ അധ്യാപിക വിവരം ചൈല്‍ഡ് ലൈനില്‍ അറിയിക്കുകയായിരുന്നു. തന്നെയും സഹോദരിമാരെയും പിതാവ് നിരന്തരം പീഡിപ്പിക്കുന്നുവെന്ന് പെണ്‍കുട്ടി മൊഴി നല്‍കി. ചൈല്‍ഡ് ലൈന്‍ ഉദ്യോഗസ്ഥര്‍ മറ്റ് മൂന്ന് പെണ്‍കുട്ടികളെ കൂടി വിളിച്ചുവരുത്തി ഇതേക്കുറിച്ച് ചോദിച്ചപ്പോള്‍ ഇവര്‍ ശരിവച്ചതോടെയാണ് കേസ് രജിസ്റ്റര്‍ ചെയ്തത്. സാമ്പത്തികമായി പിന്നാക്കം നില്‍ക്കുന്ന കുടുംബമാണ് ഇവരുടേത്. നിത്യമദ്യപാനിയാണ് പിടിയിലായ പ്രതിയെന്നാണ് വിവരം. സംഭവത്തില്‍ വിശദമായ അന്വേഷണം ആരംഭിച്ചിട്ടുണ്ട്.
കുട്ടികളില്‍നിന്ന് വിശദമായി മൊഴി രേഖപ്പെടുത്തിയ പൊലിസ് പെണ്‍കുട്ടികളുടെ അമ്മയെയും ചോദ്യം ചെയ്യുകയാണ്. ഇവരുടെ അറിവോടെയാണ് പീഡനം നടന്നതെങ്കില്‍ ഇവര്‍ക്കെതിരേയും നിയമനടപടി സ്വീകരിക്കും.