ഇരിട്ടി: ഇരിട്ടി-തളിപ്പറമ്പ് സംസ്ഥാന പാതയില്‍ ടിപ്പര്‍ ലോറിയും മിനി ലോറിയും കൂട്ടിയിടിച്ച് രണ്ടു പേര്‍ക്ക് പരുക്കേറ്റു. പാപ്പിനിശ്ശേരി സ്വദേശികളായ സുനില്‍(36), റിനീഷ് നാഥന്‍(41) എന്നിവര്‍ക്കാണ് പരുക്കേറ്റത്. ഇവരെ ഇരിട്ടിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ ഉച്ചക്ക് രണ്ടോടെ പടിയൂര്‍ ഗോപികുമാര്‍ എസ്റ്റേറ്റ് കയറ്റത്തില്‍ വച്ചാണ് അപകടം. ഇരിട്ടിയില്‍ നിന്ന് ഇരിക്കൂര്‍ ഭാഗത്തേക്ക് പോകുകയായിരുന്ന മിനി ലോറിയും ഇരിക്കൂറില്‍ നിന്ന് ഇരിട്ടിയിലേക്ക് വരികയായിരുന്ന ടിപ്പര്‍ ലോറിയും കൂട്ടിയിടിച്ചാണ് അപകടമുണ്ടായത്.
കാബിനുള്ളില്‍ കുടുങ്ങി പോയ രണ്ടു പേരെയും ഓടിക്കൂടിയ നാട്ടുകാര്‍ കാബിന്‍ വെട്ടിപൊളിച്ച് പുറത്തെടുത്ത് ആശുപത്രിയില്‍ എത്തിക്കുകയായിരുന്നു.
ഇരിട്ടിയില്‍ നിന്നു സ്റ്റേഷന്‍ ഓഫിസര്‍ ജോണ്‍സണ്‍ പീറ്ററുടെ നേതൃത്വത്തില്‍ എത്തിയ അഗ്‌നിശമന സേനാ പ്രവര്‍ത്തകരും ഇരിക്കൂര്‍ പൊലിസും നാട്ടുകാരും ചേര്‍ന്ന് ലോറികള്‍ തള്ളി നീക്കി മണിക്കൂറുകളോളം തടസ്സപെട്ട വാഹന ഗതാഗതം പുനസ്ഥാപിക്കുകയായിരുന്നു.