ചെറുവത്തൂര്‍: കൈതക്കാടിന്റെ പ്രിയപ്പെട്ട പാട്ടുകാരനു കണ്ണീരില്‍ കുതിര്‍ന്ന യാത്രാമൊഴി. കഴിഞ്ഞ ദിവസം ബേക്കല്‍ പൂച്ചക്കാട് ഉണ്ടായ വാഹനാപകടത്തിലാണു പ്രമുഖ മാപ്പിളപ്പാട്ട് രചയിതാവും സാമൂഹ്യ സാംസ്‌കാരിക രംഗങ്ങളിലെ സജീവസാന്നിധ്യവുമായിരുന്ന കുന്നത്ത് അഷ്‌റഫ് മരണപ്പെട്ടത്. പോസ്റ്റ് മോര്‍ട്ടത്തിനു ശേഷം ഇന്നലെ ഉച്ചയോടെയാണു ഭൗതിക ശരീരം കൈതക്കാട് എത്തിച്ചത്. നൂറുകണക്കിനാളുകള്‍ അന്തിമോപചാരം അര്‍പ്പിക്കാന്‍ എത്തിയിരുന്നു.
സംഗീത പ്രേമികളുടെ മനസില്‍ തത്തിക്കളിക്കുന്ന നിരവധി മാപ്പിളപ്പാട്ടുകള്‍ സമ്മാനിച്ച അനുഗ്രഹീത കലാകാരന്റെ അപ്രതീക്ഷിത വേര്‍പാട് മാപ്പിള കലാമേഖലയ്ക്കും വലിയ നഷ്ടമാണ്. കാസര്‍കോട് നടന്ന ടി ഉബൈദ് അനുസ്മരണ പരിപാടിയില്‍ പങ്കെടുത്തു സ്‌കൂട്ടറില്‍ മടങ്ങവേയാണ് അഷ്‌റഫ് അപകടത്തില്‍ പെട്ടത്. കൈതക്കാട് ജുമാമസ്ജിദിലായിരുന്നു ഖബറടക്കം.