കൊച്ചി: പ്ലേഓഫ് സാധ്യതകള്‍ സ്വപ്നം കണ്ട് കേരള ബ്ലാസ്റ്റേഴ്‌സ് ഇന്ന് ജംഷഡ്പുര്‍ എഫ്.സിയെ അവരുടെ തട്ടകത്തില്‍ നേരിടും. അവസാന രണ്ട് മത്സരങ്ങളിലും മികച്ച വിജയം കരസ്ഥമാക്കിയതിന്റെ ആവേശത്തിലാണ് ബ്ലാസ്റ്റേഴ്‌സ് ഇന്ന് ജംഷഡ്പൂര്‍ എഫ്.സിയെ നേരിടാനൊരുങ്ങുന്നത്. 

നിലവില്‍ മികച്ചൊരു ഇലവനെ വാര്‍ത്തെടുക്കാന്‍ സാധിച്ചിട്ടുണ്ടെന്നാണ് പരിശീലകന്‍ ഷറ്റോരിയുടെ വിശദീകരണം. അവസാന രണ്ട് മത്സരത്തിലെ സ്ഥിരത ഇന്നത്തെ മത്സരത്തിലും തുടര്‍ന്നാല്‍ ഇന്നത്തെ മൂന്ന് പോയിന്റും ബ്ലാസ്റ്റേഴ്‌സിന് സ്വന്തമാക്കാമെന്ന് ഷറ്റോരി പറഞ്ഞു. തുടര്‍ച്ചയായുള്ള പരാജയങ്ങളിലും സമനിലകളിലും കുരുങ്ങിക്കിടന്ന കഴിഞ്ഞ വര്‍ഷത്തെ അപേക്ഷിച്ച് മികച്ച തുടക്കമാണ് പുതുവര്‍ഷത്തില്‍ ബ്ലാസ്റ്റേഴ്‌സിന് ലഭിച്ചത്. 

തങ്ങളുടെ ഹോം ഗ്രൗണ്ടില്‍ ഹൈദരബാദിനെ ഒന്നിനെതിരേ അഞ്ച് ഗോളുകള്‍ക്ക് പരാജയപ്പെടുത്തിയാണ് ബ്ലാസ്റ്റേഴ്‌സ് പുതുവര്‍ഷത്തെ എതിരേറ്റത്. തുടര്‍ന്ന് കഴിഞ്ഞ 12ന് എ.ടി.കെയെ അവരുടെ തട്ടകത്തില്‍ ഒരുഗോളിന് പരാജയപ്പെടുത്തി വിജയത്തുടര്‍ച്ചനേടി.

 ഈ രണ്ട് വിജയങ്ങളുടെ ആത്മവിശ്വാസത്തിലാണ് ബ്ലാസ്റ്റേഴ്‌സ് ഇന്ന് ജംഷഡ്പുരിനെതിരേ കളത്തിലിറങ്ങുന്നത്. ഇതിനു മുന്‍പ് ബ്ലാസ്റ്റേഴ്‌സിന്റെ ഹോം ഗ്രൗണ്ടായ കൊച്ചിയില്‍  ഇരുവരും ഏറ്റുമുട്ടിയപ്പോള്‍ സമനിലയായിരുന്നു ഫലം. എന്നാല്‍ ഇത്തവണ വിജയത്തില്‍ കുറഞ്ഞൊന്നും ബ്ലാസ്റ്റേഴ്‌സ് ലക്ഷ്യം വയ്ക്കുന്നില്ല. നിലവില്‍ പോയിന്റ് നിലയില്‍ ബ്ലാസ്റ്റേഴ്‌സിന് തൊട്ടുതാഴെ എട്ടാം സ്ഥാനത്താണ് ജംഷഡ്പുര്‍. 

11 മത്സരങ്ങള്‍ കളിച്ച ജംഷഡ്പുരിന് മൂന്ന് വിജയവും നാലുവീതം തോല്‍യും സമനിലയിലുമായി 13 പോയിന്റാണുള്ളത്. ബ്ലാസ്റ്റേഴ്‌സിന് 12 മത്സരങ്ങളില്‍ മൂന്ന് വിജയവും അഞ്ച് സമനിലയും നാല് തോല്‍വിയുമുള്‍പ്പെടെ 14 പോയിന്റുണ്ട്. പരുക്കേറ്റ് പുറത്തായിരുന്ന കളിക്കാരില്‍ ഭൂരിഭാഗവും ഇപ്പോള്‍ ഫിറ്റ്‌നസിലേക്ക് തിരിച്ചെത്തിയതിനാല്‍ ഇന്ന് നടക്കുന്ന മത്സരത്തിന്റെ ഫലം തങ്ങള്‍ക്ക് അനുകൂലമാകുമെന്ന പ്രതീക്ഷയിലാണ് ബ്ലാസ്റ്റേഴ്‌സ് കോച്ച് ഷറ്റോരി. ആദ്യ നാലിലല്ല മറിച്ച് ജംഷഡ്പുറിനെതിരായ മത്സരത്തിലാണ് ഇപ്പോള്‍ ശ്രദ്ധ കേന്ദ്രീകരിക്കുന്നത്. അതിനുശേഷം ഗോവ, പിന്നെ ചെന്നൈയിന്‍ എന്നിവയ്‌ക്കെതിരായ മത്സരങ്ങളിലേക്കാണ് ശ്രദ്ധചെലുത്തുകയെന്നും ഷറ്റോരി പറഞ്ഞു. ബ്ലാസ്റ്റേഴ്‌സിന്റെ കറുപ്പ് നിറത്തിലുള്ള എവേ ജഴ്‌സി അണിഞ്ഞാകും ഇന്ന് ബ്ലാസ്റ്റേഴ്‌സ് ജംഷഡ്പുരിനെ നേരിടാനിറങ്ങുക. 25ന് ഗോവയില്‍ നടക്കുന്ന മത്സരത്തിലും കേരള ബ്ലാസ്റ്റേഴ്‌സ് ഇതേ ജഴ്‌സി ധരിച്ചാകും ഇറങ്ങുക. 

അതേസമയം ജയം അനിവാര്യമായ ജംഷഡ്പുര്‍ ഇന്ന് ജീവന്‍മരണ പോരാട്ടം പുറത്തെടുക്കും. സ്വന്തം കാണികള്‍ക്ക് മുമ്പില്‍ ജയം മാത്രമായിരിക്കും അവരുടെ ലക്ഷ്യം. 

മികച്ച യുവതാരങ്ങളുള്ള ജംഷഡ്പുരിനെ തടഞ്ഞുനിര്‍ത്തണമെങ്കില്‍ ബ്ലാസ്റ്റേഴ്‌സിന് നന്നായി അധ്വാനിക്കേണ്ടി വരും.