മാഞ്ചസ്റ്റര്‍: പതിനെട്ടാം വയസ്സു മുതല്‍ മാഞ്ചസ്റ്റര്‍ യുനൈറ്റഡിലെ സ്ഥിരം സാന്നിധ്യവും ക്ലബ്ബിലെ തന്നെ റെക്കോഡ് ഗോള്‍ വേട്ടക്കാരനുമായ വെയ്ന്‍ റൂണി മാഞ്ചസ്റ്റര്‍ വിടുന്നതായി അഭ്യൂഹം.
റൂണി ക്ലബ്ബ് വിടാനൊരുങ്ങുന്നു എന്ന വ്യക്തമായ സൂചനകള്‍ നല്‍കിക്കൊണ്ടാണ് റൂണിയുടെ ഏജന്റ് പോള്‍ സ്‌ട്രെറ്റ്‌ഫോര്‍ഡ് ചൈനയിലേക്ക് പോയിരിക്കുന്നത്.

ചൈനീസ് ട്രാന്‍സ്ഫര്‍ വിന്‍ഡോ 28ന് തീരാനിരിക്കെയാണ് പോള്‍ സ്‌ട്രെറ്റ്‌ഫോര്‍ഡിന്റെ ചൈനായാത്ര.
മുന്‍പ് പലതവണ ചൈനീസ് സൂപ്പര്‍ ലീഗില്‍ കളിക്കാന്‍ റൂണി താല്‍പര്യം പ്രകടിപ്പിച്ചിട്ടുണ്ട്.

എന്നാല്‍ ഏതു ക്ലബ്ബുമായാണ് സ്‌ട്രെറ്റ്‌ഫോര്‍ഡ് ബന്ധപ്പെട്ടത് എന്ന് വ്യക്തമല്ല. പോള്‍ സ്‌ട്രെറ്റ്‌ഫോര്‍ഡിന്റെ ചൈനായാത്രയ്ക്ക് പിന്നാലെ ക്ലബ്ബ് മാനേജര്‍ ജോസ് മൗറീഞ്ഞോ റൂണിയെ 31ന് ശേഷം ക്ലബ്ബ് വിടാനനുവദിക്കുമെന്നാണ് അടുത്ത വൃത്തങ്ങള്‍ നല്‍കുന്ന സൂചന. മൗറീഞ്ഞോക്ക് കീഴില്‍ കുറച്ചുനാളായി റൂണിയുടെ പ്രകടനം മികവുറ്റതല്ല എന്നതാണ് ക്ലബ്ബ് വിടാന്‍ ഇരുവരെയും പ്രേരിപ്പിച്ചതെന്നാണ് കരുതുന്നത്.