തിരുവനന്തപുരം: രൂക്ഷമായ ഗ്രൂപ്പ് തര്‍ക്കങ്ങള്‍ക്കൊടുവില്‍ പത്ത് ജില്ലകളിലെ മാത്രം പ്രസിഡന്റുമാരെ പ്രഖ്യാപിച്ച് ബി.ജെ.പി സംസ്ഥാന ഘടകം.
വി. മുരളീധരന്റെയും പി.കെ കൃഷ്ണദാസിന്റെയും നേതൃത്വത്തിലുള്ള ഗ്രൂപ്പുകള്‍ അതിരൂക്ഷമായ തര്‍ക്കം തുടരുന്ന സാഹചര്യത്തില്‍ നാല് ജില്ലകളിലെ പ്രസിഡന്റുമാരെ പ്രഖ്യാപിക്കാന്‍ ബി.ജെ.പിക്ക് കഴിഞ്ഞിട്ടില്ല. പ്രഖ്യാപിച്ച പത്തില്‍ ഏഴിടവും കൃഷ്ണദാസ് പക്ഷം പിടിച്ചെടുത്തപ്പോള്‍ തിരുവനന്തപുരത്തും പാലക്കാട്ടും മാത്രമാണ് മുരളീധര പക്ഷം നേതാക്കള്‍ ജില്ലാ പ്രസിഡന്റുമാരായത്. കൊല്ലത്ത് ഗ്രൂപ്പുകളെ വെട്ടി ബി.ബി ഗോപകുമാര്‍ പ്രസിഡന്റായി.
തിരുവനന്തപുരത്ത് വി.വി രാജേഷും പാലക്കാട് അഡ്വ.ഇ. കൃഷ്ണദാസുമാണ് പ്രസിഡന്റുമാര്‍. പത്തനംതിട്ടയില്‍ അശോകന്‍ കുളനട, ഇടുക്കിയില്‍ കെ.എസ് അജി, തൃശൂര്‍ കെ.കെ അനീഷ്, കോഴിക്കോട് വി.കെ സജീവന്‍, വയനാട് സജി ശങ്കര്‍, മലപ്പുറം രവി തേലത്ത്, ആലപ്പുഴ എം.വി ഗോപകുമാര്‍ എന്നിവരാണ് മറ്റു പ്രസിഡന്റുമാര്‍.
ഗ്രൂപ്പ് പോര് രൂക്ഷമായ കാസര്‍കോട്, എറണാകുളം, കോട്ടയം, കണ്ണൂര്‍ എന്നിവിടങ്ങളിലാണ് തീരുമാനം നീളുന്നത്.
ആര്‍.എസ്.എസിന്റെ ശക്തമായ ഇടപെടല്‍ ഉണ്ടായിട്ടും ഈ ജില്ലകളില്‍ ഒരു തീരുമാനത്തിലെത്താന്‍ ഇതുവരെ കഴിഞ്ഞിട്ടില്ല. ജില്ലാ പ്രസിഡന്റുമാര്‍ക്കുള്ള വോട്ടെടുപ്പില്‍ കൂടുതല്‍ വോട്ട് ലഭിച്ചെങ്കിലും ഈ ജില്ലകള്‍ പിടിച്ചെടുക്കുകയെന്ന മുരളീധര പക്ഷത്തിന്റെ നീക്കമാണ് തടസത്തിനു കാരണമെന്നു പറയുന്നു.
ജില്ലാ പ്രസിഡന്റുമാരെ തെരഞ്ഞെടുക്കുന്ന കടമ്പ പൂര്‍ത്തിയാക്കിയ ശേഷം സംസ്ഥാന പ്രസിഡന്റിനെ പ്രഖ്യാപിക്കുന്നതിലേക്ക് പോകാനാണ് ദേശീയ നേതൃത്വത്തിന്റെ തീരുമാനം.