വടക്കാഞ്ചേരി: മുളങ്കുന്നത്ത് കാവ് മെഡിയ്ക്കല്‍ കോളജില്‍ അര്‍ബുദ രോഗികള്‍ അനുഭവിയ്ക്കുന്ന ദുരിതവും വേദനയും കാണാതെ സര്‍ക്കാര്‍. മെഡിക്കല്‍ കോളജിന്റെ വികസനത്തിന് വേണ്ടി കോടികളുടെ പദ്ധതികള്‍ ആവിഷ്‌കരിയ്ക്കുന്നതായി സര്‍ക്കാര്‍ പ്രഖ്യാപിയ്ക്കുമ്പോഴും അര്‍ബുദ രോഗവിഭാഗത്തില്‍ റേഡിയേഷന്‍ നടത്താന്‍ സേഫ്റ്റി ഓഫിസര്‍ ഇല്ലാത്തതാണ് കടുത്ത പ്രതിസന്ധി.
മറ്റ് മെഡിയ്ക്കല്‍ കോളജുകളില്‍ സേഫ്റ്റി ഓഫീസര്‍മാരുടെ തസ്തിക ധാരാളം ഉണ്ടെങ്കിലും ഒരാളെ മുളങ്കുന്നത്ത് കാവിലേയ്ക്ക് മാറ്റി നിയമിയ്ക്കാന്‍ പോലും സര്‍ക്കാര്‍ തയാറാകുന്നില്ലെന്ന ആരോപണവും ശക്തമാണ്. തികഞ്ഞ അവഗണനയാണ് മെഡിയ്ക്കല്‍ കോളജിനോട് സര്‍ക്കാര്‍ പ്രകടിപ്പിയ്ക്കുന്നത്. നിരവധി അര്‍ബുദ രോഗികള്‍ ചികിത്സ ലഭിയ്ക്കാതെ മടങ്ങുമ്പോള്‍ സ്വകാര്യ ആശുപത്രികള്‍ക്ക് ചാകര കാലമാണ്. സാമ്പത്തിക ശേഷിയില്ലാത്തവര്‍ മരണത്തെ മുഖാമുഖം കാണുന്ന സ്ഥിതിവിശേഷവും നിലനില്‍ക്കുന്നു. കഴിഞ്ഞ മൂന്നുമാസമായി റേഡിയേഷന്‍ ചികിസ മുടങ്ങി കിടക്കുമ്പോഴും ജില്ലയിലെ മൂന്നുമന്ത്രിമാരും ഈ കാര്യത്തില്‍ ചെറുവിരല്‍ അനക്കുന്നില്ലെന്നാണ് പരാതി.
ഇതുമൂലം തൃശൂര്‍, പാലക്കാട്, മലപ്പുറം ജില്ലകളിലെ നിര്‍ധന രോഗികള്‍ സ്വകാര്യ ആശുപത്രികളെ ആശ്രയിക്കേണ്ട ഗതികേടിലാണ്. സേഫ്റ്റി ഓഫിസറെ അടിയന്തരമായി നിയമിക്കണമെന്ന് ആവശ്യപ്പെട്ട് യൂത്ത് കോണ്‍ഗ്രസ് പ്രവര്‍ത്തകര്‍ മെഡിയ്ക്കല്‍ കോളജ് പ്രിന്‍സിപ്പലിനെ ഇന്നലെ മൂന്ന് മണിക്കൂറോളം തടഞ്ഞുവച്ചു.  പ്രിന്‍സിപ്പലിന്റെ ചേംബറിലേക്ക് ഇരച്ച് കയറിയായിരുന്നു ഉപരോധസമരം. ചര്‍ച്ചയില്‍ തനിയ്ക്ക് ഈ വിഷയത്തില്‍ ഒന്നും ചെയ്യാനില്ലെന്നും മന്ത്രിതലത്തിലാണ് നടപടി വേണ്ടതെന്നും പ്രിന്‍സിപ്പല്‍ ഡോ. എം.എ ആന്‍ഡ്രൂസ് സമരക്കാരെ അറിയിച്ചു. ഇത് രേഖാമൂലം എഴുതി നല്‍കുകയും ചെയ്തു.  ഇതോടെയാണ് സമരം അവസാനിപ്പിച്ചത്. തുടര്‍ന്ന് നടന്ന പൊതുസമ്മേളനം ഡി.സി.സി വൈസ് പ്രസിഡന്റ് രാജേന്ദ്രന്‍ അരങ്ങത്ത് ഉദ്ഘാടനം ചെയ്തു.  ജനദ്രോഹം നടത്തുന്ന മന്ത്രിമാരേയും വരും ദിവസങ്ങളില്‍ വഴിയില്‍ തടയുമെന്ന് രാജേന്ദ്രന്‍ അറിയിച്ചു. ബിജു കോലഴി അധ്യക്ഷനായി. സുരേഷ് അവണൂര്‍, ജയന്‍ മംഗലം, അഭിന്‍സ്, പ്രസാദ്, സതീശന്‍, രാധാകൃഷ്ണന്‍ സംസാരിച്ചു.