തരുവനന്തപുരം: ക്ഷയരോഗ നിര്‍മാര്‍ജനത്തിന് സംസ്ഥാനവ്യാപകമായി പ്രതിദിന ചികിത്സാരീതി മൊബൈല്‍ അധിഷ്ഠിത സാങ്കേതിക വിദ്യയോടുകൂടി നടപ്പാക്കിത്തുടങ്ങിയെന്ന് ആരോഗ്യവകുപ്പുമന്ത്രി കെ.കെ ശൈലജ വാര്‍ത്താസമ്മേളനത്തില്‍ അറിയിച്ചു. ഒന്നിടവിട്ട ദിവസങ്ങളില്‍ മരുന്നു കഴിക്കുന്ന മുന്‍ രീതിയില്‍ നിന്ന് വ്യത്യസ്തമായി എല്ലാ ദിവസവും മുടങ്ങാതെ ക്ഷയത്തിനെതിരേയുള്ള മരുന്നുകള്‍ ഒന്നായി ചേര്‍ത്ത പ്രതിദിന നിശ്ചിത മാത്രാ മിശ്രിതങ്ങള്‍(ഡയ്‌ലി റെജിമെന്‍ ഫിക്‌സഡ് ഡോസ് കോമ്പിനേഷന്‍-ഡോട്ട്‌സ്) ശരീര ഭാരത്തിന് അനുസരിച്ച് കഴിക്കുന്ന രീതിയാണ് പ്രയോഗത്തില്‍ വരുത്തിയത്. ഡോട്ട്‌സ് സര്‍ക്കാര്‍-സ്വകാര്യ ആശുപത്രികളില്‍ ലഭ്യമാകും. ഈ വര്‍ഷത്തെ ലോക ക്ഷയരോഗ ദിനാചരണത്തിന്റെ സംസ്ഥാനതല പരിപാടികള്‍ മാര്‍ച്ച് 24ന് തിരുവനന്തപുരത്ത് നടത്താന്‍ തീരുമാനിച്ചെന്നും ശൈലജ അറിയിച്ചു.
എസ്.എം.ഇ കോളജിലെ വിദ്യാര്‍ഥികളുടെ ആശങ്ക പരിഹരിക്കാന്‍ വിദ്യാഭ്യാസ-ആരോഗ്യ മന്ത്രിമാര്‍, ആരോഗ്യ സര്‍വകലാശാല-എം.ജി സര്‍വകലാശാല എന്നിവിടങ്ങളിലെ വി.സിമാര്‍, ഇരു വകുപ്പുകളിലെയും സെക്രട്ടറിമാര്‍ എന്നിവര്‍ അംഗങ്ങളായുള്ള ഒരു കമ്മിറ്റി രൂപീകരിച്ചിട്ടുണ്ട്.