സിഡ്‌നി: ഇന്ത്യയുടെ ചരിത്രവിജയത്തില്‍ നിര്‍ണായക പങ്ക് വഹിച്ച ഋഷഭ് പന്തിനേയും പൂജാരയേയും തേടി മറ്റൊരു നേട്ടം കൂടി. ഐ.സി.സി ടെസ്റ്റ് റാങ്കിങില്‍ വന്‍ കുതിപ്പ് നടത്തിയ പന്ത് 21 സ്ഥാനങ്ങള്‍ മുന്നേറി 17ാം സ്ഥാനത്തെത്തി. ഓസീസിനെതിരായ പരമ്പരയില്‍ ഏഴ് ഇന്നിങ്‌സുകളില്‍നിന്ന് ഒരു സെഞ്ചുറിയടക്കം 58.33 ശരാശരിയില്‍ 350 റണ്‍സാണ് പന്ത് നേടിയത്. ടെസ്റ്റ് റാങ്കിങില്‍ ഇതാദ്യമായാണ് ഇന്ത്യയുടെ ഒരു വിക്കറ്റ് കീപ്പര്‍ 17ാം റാങ്കിലെത്തിയത്. 2013ല്‍ എം.എസ് ധോണി 19ാം റാങ്കിലെത്തിയതായിരുന്നു മുന്‍പത്തെ റെക്കോര്‍ഡ്. ഓസീസിനെതിരേ മൂന്നു സെഞ്ചുറികളടക്കം 74.43 ശരാശരിയില്‍ 521 റണ്‍സ് നേടിയ പൂജാര സ്റ്റീവ് സ്മിത്തിനെ പിന്തള്ളി മൂന്നാംസ്ഥാനത്തേക്കു കയറി. ഒരു സ്ഥാനം കയറിയാണ് പൂജാര മൂന്നാംറാങ്കിലെത്തിയത്. ബാറ്റിങ്ങില്‍ രവീന്ദ്ര ജഡേജ ആറ് സ്ഥാനങ്ങള്‍ കയറി 57ലും ഓപ്പണര്‍ മായങ്ക് അഗര്‍വാള്‍ അഞ്ച് സ്ഥാനം കയറി 62ലുമെത്തി.