കണ്ണൂര്‍: പയ്യന്നൂര്‍ സ്‌പോര്‍ട്‌സ് ആന്‍ഡ് കള്‍ച്ചറല്‍ ഡവലപ്പ്‌മെന്റ് അസോസിയേഷന്‍ സംഘടിപ്പിക്കുന്ന ടി ഗോവിന്ദന്‍ ട്രോഫി ഓള്‍ ഇന്ത്യാ ഇന്‍വിറ്റേഷന്‍ വോളിബോള്‍ ടൂര്‍ണമെന്റിനു 26നു പയ്യന്നൂരില്‍ തുടക്കമാകുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു.  
ഇന്ത്യന്‍ റെയില്‍വേ, ഒ.എന്‍.ജി.സി ഡെറാഡൂണ്‍, ബി.പി.സി.എല്‍ കേരള, ഇന്ത്യന്‍ നേവി, ഐ.ഒ.ബി ചെന്നൈ, ഇന്ത്യന്‍ ആര്‍മി, ഇന്ത്യന്‍ ഇന്‍കം ടാക്‌സ്, എസ്.ആര്‍.എം ചെന്നൈ, വെസ്റ്റേണ്‍ റെയില്‍വേ, കെ.എസ്.ഇ.ബി, കേരള പൊലിസ്, സ്‌പോര്‍ട്‌സ് അതോറിറ്റി ഓഫ് ഇന്ത്യ, ഇന്ത്യന്‍ ഇന്‍കം ടാക്‌സ് ടീമുകള്‍ മത്സരിക്കും. പയ്യന്നൂര്‍ മുന്‍സിപ്പല്‍ ഫ്‌ളഡ്‌ലിറ്റ് സ്റ്റേഡിയത്തില്‍ പ്രത്യേകം തയാറാക്കിയ ഗ്യാലറിയിലാണു മത്സരം. വനിതാ വിഭാഗത്തില്‍ സായ്, കെ.എസ്.ഇ.ബി, വെസ്റ്റേണ്‍ റെയില്‍വേ ടീമുകള്‍ മത്സരിക്കും.
എട്ടു ദിവസങ്ങളിലായി 22 മത്സരങ്ങള്‍ നടക്കും. ചാംപ്യന്‍മാര്‍ക്ക് രണ്ടു ലക്ഷം രൂപയും ടി ഗോവിന്ദന്‍ ട്രോഫിയും റണ്ണേഴ്‌സപ്പിനു 150000 രൂപയും പ്രൊഫ. പി.വി ഗോവിന്ദന്‍ കുട്ടി സ്മാരക ട്രോഫിയും നല്‍കും. മികച്ച വാര്‍ത്താ റിപ്പോര്‍ട്ടിങിനു കെ രാഘവന്‍ മാസ്റ്റര്‍ പുരസ്‌കാരം നല്‍കും.
വാര്‍ത്താ സമ്മേളനത്തില്‍ ഭാരവാഹികളായ ടി.ഐ മധുസൂദനന്‍, എം.കെ രാജന്‍, പ്രൊഫ. കെ.വി ദേവസ്യ, കെ.വി ശശിധരന്‍, എ.വി രഞ്ജിത്ത് സംബന്ധിച്ചു.