അബൂദബി: ഏഷ്യന്‍ കപ്പില്‍ യമനുമേല്‍ ഇറാന്റെ ഗോള്‍മഴ. ടൂര്‍ണമെന്റിലെ ഇറാന്റെ ആദ്യ മത്സരത്തില്‍ എതിരില്ലാത്ത അഞ്ചുഗോളുകള്‍ക്കാണ് ലോകകപ്പ് സംഘം യമനെ തകര്‍ത്തത്.

12-ാം മിനുട്ടില്‍ തന്നെ ഇറാന്‍ ഗോള്‍വേട്ടക്ക് തുടക്കമിച്ചു. ലോകകപ്പ് താരം മെഹ്ദി തെരീമിയാണ് ഗോള്‍പട്ടികയിലെ ആദ്യത്തെത് സ്വന്തമാക്കിയത്. 23-ാം മിനുട്ടില്‍ അഷ്ഖാന്‍ ദെയാഗിന്റെ ഫ്രീകിക്കില്‍ നിന്നായിരുന്നു രണ്ടാം ഗോള്‍ പിറന്നത്. 25-ാം മിനുട്ടില്‍ മെഹ്ദി തെരീമി രണ്ടാമതും ഗോള്‍ കണ്ടെത്തി സ്‌കോര്‍ 3-0 എന്ന നിലയിലെത്തിച്ചു. ആദ്യ പകുതി അവസാനിക്കുമ്പോള്‍ ഇറാന്‍ മൂന്ന് ഗോളിന് മുന്നിട്ടു നിന്നു.
രണ്ടാം പകുതിക്ക് ശേഷം 53-ാം മിനുട്ടില്‍ സര്‍ദാര്‍ അസുമോന്‍ നാലാം ഗോളും നേടി. 78-ാം മിനുട്ടില്‍ സമന്‍ ഗദ്ദോസ് അഞ്ചാം ഗോളും നേടി ഇറാന്റെ ഗോള്‍പട്ടിക പൂര്‍ത്തിയാക്കി. മറ്റൊരു മത്സരത്തില്‍ ദക്ഷിണ കൊറിയ 1-0 ത്തിന് ഫിലിപ്പൈന്‍സിനെ പരാജയപ്പെടുത്തി.
67-ാം മിനുട്ടില്‍ ഹുവാങ് യി ജോ യാണ് കൊറിയയുടെ വിജയഗോള്‍ നേടിയത്. കൊറിയയുടെ ടോട്ടന്‍ ഹാം താന്‍ സണ്‍ ഹുന്‍ മിന്‍ രണ്ട് മത്സരങ്ങള്‍ക്ക് ശേഷം ടീമില്‍ ചേരുമെന്നായിരുന്നു ടോട്ടനം ക്യാംപില്‍നിന്ന് അറിയിപ്പ് ലഭിച്ചത്. ഇനി കിര്‍ഗിസ്താനുമായും ചൈനയുമായുമാണ് കൊറിയയുടെ രണ്ട് മത്സരങ്ങള്‍. ഇതില്‍ ചൈനക്കെതിരേയുള്ള മത്സരത്തില്‍ ടീമിനൊപ്പം ചേര്‍ന്നേക്കും.