ഐ.ഐ.ടികളിലെ പ്രവേശനത്തിന് നാഷണല്‍ ടെസ്റ്റിങ് ഏജന്‍സി (എന്‍.ടി.എ) നടത്തുന്ന ജെ.ഇ.ഇ അഡ്വാന്‍സ്ഡ് പരീക്ഷയ്ക്ക് തയാറെടുക്കുന്നവര്‍ക്കായി പരീക്ഷയുടെ മുഖ്യ സംഘാടകരായ ഡല്‍ഹി ഐ.ഐ.ടി മോക് ടെസ്റ്റ് ലിങ്ക് സജ്ജമാക്കി. jeeadv.ac.in എന്ന വെബ്‌സൈറ്റില്‍ വിദ്യാര്‍ഥികള്‍ക്ക് മോക് ടെസ്റ്റ് എഴുതാം. ജെ.ഇ.ഇ അഡ്വാന്‍സ്ഡ് പരീക്ഷ മെയ് 17ന് രണ്ട് ഷിഫ്റ്റുകളിലായി നടത്തും. ജെ.ഇ.ഇ മെയിന്‍ പരീക്ഷയില്‍ ആദ്യ 2,45,000 റാങ്കുകാര്‍ക്കാണ് ജെ.ഇ.ഇ അഡ്വാന്‍സ്ഡ് എഴുതാന്‍ അവസരം ലഭിക്കുക.
ജനുവരിയില്‍ നടത്തിയ ജെ.ഇ.ഇ മെയിന്‍ ഒന്നാംഘട്ട പരീക്ഷാഫലം 31ന് പ്രസിദ്ധീകരിക്കും. സ്‌കോര്‍ ഉയര്‍ത്തണമെന്ന് ആഗ്രഹിക്കുന്നവര്‍ക്ക് ഏപ്രില്‍ മൂന്നുമുതല്‍ ഒന്‍പതുവരെ നടക്കുന്ന രണ്ടാംഘട്ട പരീക്ഷ എഴുതാം. ഫെബ്രുവരി ഏഴുമുതല്‍ മാര്‍ച്ച് ഏഴുവരെ ഇതിനായി അപേക്ഷിക്കാം. സി.ബി.എസ്.ഇയില്‍ നിന്ന് നാഷണല്‍ ടെസ്റ്റിങ് ഏജന്‍സി (എന്‍.ടി.എ) ഏറ്റെടുത്ത ശേഷം ജെ.ഇ.ഇ പരീക്ഷയ്ക്ക് കഴിഞ്ഞ വര്‍ഷം മുതലാണ് രണ്ട് അവസരം നല്‍കുന്നത്. മികച്ച സ്‌കോറായിരിക്കും പരിഗണിക്കുക.