കോട്ടയം: രാജ്യത്തേറ്റവും ചൂടുള്ള ജില്ലയായി കോട്ടയം. പുനലൂരിനെയും പാലക്കാടിനെയും പിന്‍തള്ളിയാണ് കോട്ടയം രാജ്യത്തെ പ്രധാന ചൂടുള്ള ജില്ലയായി മാറിയത്.
ശരാശരി ചൂടിനേക്കാള്‍ 3 ഡിഗ്രിയോളം കൂടുതലാണ് കോട്ടയത്ത് രേഖപ്പെടുത്തിയതെന്നും കേന്ദ്ര കാലാവസ്ഥാ വകുപ്പ് പറയുന്നു.
കഴിഞ്ഞ ഒന്‍പതാം തിയതിയും കോട്ടയത്തുതന്നെയായിരുന്നു രാജ്യത്ത് ഏറ്റവുമധികം ചൂട് രേഖപ്പെടുത്തിയത് (35.50). അതേ ദിവസം അയല്‍ ജില്ലയായ ആലപ്പുഴയായിരുന്നു രണ്ടാം സ്ഥാനത്ത്(35.40).
പതിനേഴിന് കോട്ടയത്ത് 35 ഡിഗ്രി സെല്‍ഷ്യസായിരുന്നു രേഖപ്പെടുത്തിയത്. 18ന് ആലപ്പുഴ വീണ്ടും മുന്നിലെത്തി. 19 ന് കോട്ടയം വീണ്ടും മുന്നിലെത്തുകയായിരുന്നു. അന്നേ ദിവസം തൊട്ടു പിന്നില്‍ വന്നതാവട്ടെ കൊച്ചിയും.
എന്നാല്‍ 13നും 15 നും കണ്ണൂരായിരുന്നു രാജ്യത്ത് ഏറ്റവും മുന്നില്‍. സാധാരണ ഗതിയില്‍ ഉത്തരേന്ത്യന്‍ പ്രദേശങ്ങളാണ് ചൂടിന്റെ കാര്യത്തില്‍ മുന്നിലെങ്കില്‍ അവിടങ്ങളില്‍ പെയ്യുന്ന മഴയാണിപ്പോള്‍ ചൂട് കുറയ്ക്കുന്നത്. കര്‍ണാടക, ആന്ധ്ര സംസ്ഥാനങ്ങളിലും മാറി മാറി ചൂട് ഉയരാറുണ്ട്.
ഇവിടങ്ങളിലും ദിവസങ്ങളായി മഴ പെയ്യുകയാണ്. വരും ദിവസങ്ങളിലും കോട്ടയം ചൂടിന്റെ കോട്ടയാകുമെന്നാണ് ഡല്‍ഹി കാലാവസ്ഥ നിരീക്ഷണ കേന്ദ്രത്തിന്റെ നിഗമനം.