റിയാദ്: സഊദി രാജകുടുംബാംഗം ബന്ദർ ബിൻ മുഹമ്മദ് ബിൻ അബ്‌ദുറഹ്‌മാൻ രാജകുമാരൻ അന്തരിച്ചു. 65 വയസായിരുന്നു. സഊദി റോയൽ കോർട്ടാണ് മരണ വിവരം പുറത്ത് വിട്ടത്. സഊദി ഭരണാധികാരി സൽമാൻ ബിൻ അബ്‌ദുൽ അസീസ് ആലു സഊദ് രാജാവിന്റെ പിതൃവ്യ പുത്രനാണ് അന്തരിച്ച ബന്ദർ മുഹമ്മദ് ബിൻ അബ്‌ദുറഹ്‌മാൻ രാജകുമാരൻ. 1996 ൽ അന്തരിച്ച പ്രശസ്‌ത സഊദി കവിയും രാജകുടുംബാംഗവുമായ സഊദ് ബിൻ മുഹമ്മദ് രാജകുമാരൻ്റെ മകനാണ്.

സതാം ബിൻ ഖാലിദ് ആലു സഊദ് രാജകുമാരൻ , നായിഫ് ബിൻ മംദൂഹ് രാജകുമാരൻ, തുടങ്ങി നിരവധി രാജകുടുംബാംഗങ്ങൾ രാജകുമാരൻ്റെ വിയോഗത്തിൽ അനുശോചിച്ചു. റിയാദിലെ ഇമാം തുർക്കി ബിൻ അബ്‌ദുല്ല മസ്‌ജിദിൽ അസർ നിസ്‌കാര ശേഷം മയ്യിത്ത് നമസ്ക്കാരം നിർവ്വഹിക്കപ്പെടുമെന്ന് റോയൽ കോർട്ട് അറിയിപ്പിൽ വ്യക്തമാക്കി.