കല്‍പ്പറ്റ: അങ്കണവാടികള്‍ക്ക് തയാറാക്കിയ വാര്‍ഷിക കലണ്ടറില്‍ റമദാന്‍ സെപ്റ്റംബറില്‍. ജൂണ്‍ ആദ്യവാരത്തില്‍ റമദാന്‍ മാസം സമാഗതമായെങ്കിലും അങ്കണവാടി തീംചാര്‍ട്ടില്‍ അത് രണ്ടുമാസം കഴിഞ്ഞാണ് ഇടംപിടിച്ചിരിക്കുന്നത്. അങ്കണവാടികളുടെ സമഗ്രമായ പ്രവര്‍ത്തനത്തിന് വേണ്ടി കേരള സര്‍ക്കാര്‍ സംയോജിത ശിശുവികസന സേവന പദ്ധതി പ്രകാരമാണ് തീം ചാര്‍ട്ട് തയാറാക്കിയിരിക്കുന്നത്.

സമൂഹ നോമ്പുതുറ, റമദാന്‍ ആഘോഷം, മൈലാഞ്ചി ഇടല്‍, ഇലകൊണ്ട് ചന്ദ്രനെ നിര്‍മിക്കല്‍, പഴം-പത്തിരി-പായസം കളി, ആശംസാ കാര്‍ഡ് നിര്‍മാണം, അമ്പിളിമാമനെ വരയ്ക്കല്‍, കൊളാഷ് നിര്‍മാണം എന്നിവയാണ് ഈ കലണ്ടര്‍ പ്രകാരം സെപ്റ്റംബര്‍ മാസത്തില്‍ നടക്കേണ്ട പ്രവര്‍ത്തനങ്ങള്‍. പക്ഷേ റമദാന്‍ അപ്പോഴേക്കും അവസാനിക്കുന്നതിനാല്‍ സമൂഹനോമ്പുതുറ പോലുള്ളവ നടപ്പിലാക്കാന്‍ കഴിയില്ല. അറബിമാസങ്ങള്‍ ചാന്ദ്രവര്‍ഷ പ്രകാരം നിര്‍ണയിക്കപ്പെടുന്നതിനാല്‍ റമദാന്‍ മാസം ഓരോ വര്‍ഷവും മാറിക്കൊണ്ടിരിക്കും. ഇതു സംബന്ധിച്ച ധാരണയില്ലാതെ ചാര്‍ട്ട് തയാറാക്കിയതാണ് വിനയായത്.