കല്ലമ്പലം: യുവാവിന്റെ മൃതദേഹം കത്തിക്കരിഞ്ഞ നിലയില്‍. നാവായിക്കുളം വലിയപള്ളി മുസ്‌ലിം ജുമാമസ്ജിദിന്റെ ചുറ്റുമതിലിനുള്ളില്‍ മയ്യിത്തുകള്‍ ഖബറടക്കുന്ന കാടുകയറിയ ഭാഗത്താണ് ഭാഗികമായി കത്തിയ നിലയില്‍ 35 വയസ് പ്രായം തോന്നിക്കുന്ന ആളിന്റെ മൃതദേഹം ഇന്നലെ രാവിലെ 11.30ഓടെ നാട്ടുകാര്‍ കണ്ടത്. കൊലപാതകമാകാമെന്നാണ് പ്രാഥമിക നിഗമനം. ആളെ തിരിച്ചറിഞ്ഞിട്ടില്ല. ഇതര സംസ്ഥാന തൊഴിലാളിയാണോയെന്നും പൊലിസിന് സംശയമുണ്ട് .  പുലര്‍ച്ചെ പള്ളിയില്‍ നിസ്‌കരിക്കാന്‍ വന്നവര്‍ മൃതദേഹം കിടന്നിടത്ത് തീയോ പുകയോ കണ്ടിരുന്നില്ല. മറ്റെവിടെയോ നിന്ന് മൃതദേഹം ഇവിടെ കൊണ്ടിട്ട് കത്തിച്ചതാകാമെന്നും രാവിലെ പത്തിനു ശേഷമായിരിക്കാമെന്നും നാട്ടുകാര്‍ പറഞ്ഞു. അസാധാരണമായി ഖബര്‍സ്ഥാനില്‍നിന്ന് പുകയുയരുന്നത് ശ്രദ്ധിച്ചപ്പോഴാണ് നാട്ടുകാര്‍ മൃതദേഹം കണ്ടത്. മുഖം തിരിച്ചറിയാന്‍ കഴിയാത്ത വിധം വികൃതമാണ്. നടപടിക്രമങ്ങള്‍ പൂര്‍ത്തിയാക്കി മൃതദേഹം തിരുവനന്തപുരം മെഡിക്കല്‍ കോളജ് മോര്‍ച്ചറിയിലേക്ക് മാറ്റി. പൊലിസ് അന്വേഷണം ഊര്‍ജിതപ്പെടുത്തി.