മഞ്ചേരി: ജില്ലയില്‍ പുതുക്കിയ ക്ഷയരോഗ ചികിത്സാ രീതി ഈ മാസത്തോടെ നിലവില്‍ വന്നു. ദിവസേനയുള്ള പുതിയ ചികിത്സാ രീതിയാണ് നിലവില്‍വന്നത്. നേരത്തെ ഇത് ഇടവിട്ടുള്ള ദിവസങ്ങളിലായിരുന്നു നടന്നിരുന്നത്. പുതുക്കിയ ചികിത്സാ രീതിയില്‍ ക്ഷയരോഗ ഗുളികകളുടെ എണ്ണത്തില്‍ കുറവുവരും. ക്ഷയരോഗ നിര്‍ണയം നടത്തി കഴിഞ്ഞാല്‍ പുതുക്കിയ ക്ഷയരോഗ ചികിത്സയനുസരിച്ചുള്ള സേവനം ജില്ലയിലെ എല്ലാ ആരോഗ്യ കേന്ദ്രങ്ങളിലും ലഭ്യമാവുമെന്നും രണ്ട് ആഴ്ച്ചയില്‍ കൂടുതല്‍ ചുമ അനുഭവപ്പെടുന്നവര്‍ കഫം പരിശോധന നടത്തണമെന്നും ജില്ലാ ടി.ബി ഓഫിസര്‍ പറഞ്ഞു.
ജില്ലയില്‍ ഈ മാസം മുതല്‍ 25 രോഗികള്‍ക്ക് പുതുക്കിയ ക്ഷയരോഗചികിത്സാ രീതിപ്രകാരമാണ് മരുന്നു നല്‍കിവരുന്നത്. 50കേന്ദ്രങ്ങളില്‍ അംഗീകൃത ക്ഷയരോഗ പരിശോധന കേന്ദ്രങ്ങള്‍ പ്രവര്‍ത്തിച്ചുവരുന്നുണ്ട്. ഇതില്‍ 40എണ്ണം സര്‍ക്കാര്‍ തലത്തിലും 10എണ്ണം സ്വകാര്യമേഖലയിലുമാണ് പ്രവര്‍ത്തിക്കുന്നത്. മഞ്ചേരി മെഡിക്കല്‍ കോളജിലും ക്ഷയ രോഗ നിര്‍ണയം നടത്തുന്നതിനുള്ള സൗകര്യങ്ങളുണ്ട്. അതേസമയം
വേണ്ടവിധം ഇത് പ്രയോജനപ്പെടുത്താന്‍ ഇപ്പോഴും രോഗികള്‍ തയാറാവുന്നില്ലെന്നതാണ് ആരോഗ്യപ്രവര്‍ത്തകരെ കുഴക്കുന്നത്. ആദ്യം ക്ഷയരോഗം റിപ്പോര്‍ട്ട് ചെയ്യപ്പെടുന്നയാള്‍ ആറുമാസം മരുന്ന് തുടര്‍ച്ചയായി കഴിക്കേണ്ടതുണ്ട്. എന്നാല്‍ രണ്ട് മാസം മരുന്ന് കഴിക്കുമ്പോഴേക്കും ലാബ് പരിശോധനകളില്‍ അണുബാധ തീരെ കുറഞ്ഞതായി കാണും. ഇതോടെ മരുന്ന് കഴിക്കുന്നത് രോഗി നിര്‍ത്തുന്നത് വീണ്ടും രോഗം പ്രത്യക്ഷപ്പെടാന്‍ കാരണമാക്കുകയുംചെയ്യുന്നു.
മഞ്ചേരി ചെരണിയിലെ ക്ഷയരോഗ ആശുപത്രിയില്‍ ആത്യാധുനിക രീതിയിലുള്ള പരിശോധനാ സംവിധാനവും പ്രവര്‍ത്തിച്ചുതുടങ്ങിയിട്ടുണ്ട്. ഗുരുതരമായ ടിബി രോഗം ബാധിച്ചവരുടെ കഫം പരിശോധിക്കാന്‍ ഡല്‍ഹിയിലെ കേന്ദ്ര ടിബി ഡിവിഷന്‍ ജില്ലക്ക് അനുവദിച്ച സിബി നാറ്റ് മെഷീന്‍ ഉപയോഗിച്ചാണ് വിദഗ്ധ ചികിത്സ ലഭ്യമാക്കുന്നത്. നിരന്തരം ചികിത്സിച്ചിട്ടും സുഖപ്പെടാത്ത ക്ഷയ രോഗികളുടെയും കുട്ടികളുടെയും കഫം പരിശോധിക്കാനാണ് ഈ മെഷീന്‍ ഉപയോഗിക്കുന്നത്. കഫത്തിലുണ്ടാവുന്ന ബാക്ടീരിയകളെ ഇരട്ടിപ്പിക്കുകയും തുടര്‍ന്ന് ടിബിക്ക് ഫലപ്രദമായ രിഫാംസിന്‍ മരുന്ന് ഇത്തരം അണുക്കളില്‍ എത്രത്തോളം ഫലപ്രദമാവുമെന്നും സിബി നാറ്റ് മെഷീന്‍ കണ്ടെത്തുകയും ചെയ്യുന്നു. ഒരേ സമയം എട്ടു പേരുടെ കഫം പരിശോധിക്കാന്‍ കഴിയുമെന്നമെന്ന പ്രത്യേകതയും ഈ സംവിധാനത്തിനുണ്ട്. അമേരിക്കയിലെ സെഫീഡ് കമ്പനിയാണ് സിബി നാറ്റ് നിര്‍മിച്ചിരിക്കുന്നത്. ഗുരുതരമല്ലാത്തവ നിലവിലുള്ള സംവിധാനമായ എല്‍.ഇ.ഡി.എഫ്.എം മൈക്രോസ്‌കോപിലൂടെ തന്നെയാണ് പരിശോധന നടത്തിവരുന്നത്.