ചെറുവത്തൂര്‍: റെയില്‍പാളത്തിന്റെ കുരുക്കഴിക്കാന്‍ മയ്യിച്ചയില്‍ റെയില്‍വേ അടിപ്പാത നിര്‍മാണം ത്വരിത ഗതിയില്‍ പുരോഗമിക്കുന്നു. ആറുമാസം കൊണ്ട് പ്രവൃത്തി പൂര്‍ത്തിയാക്കാന്‍ കഴിയുമെന്നാണു നിലവിലെ കണക്കുകൂട്ടല്‍. മയ്യിച്ചയുടെ പടിഞ്ഞാറന്‍ പ്രദേശങ്ങളുടെ വികസനക്കുതിപ്പിനു വഴിതുറക്കുന്ന അടിപ്പാതയാണിത്. ചെറുവത്തൂര്‍ പഞ്ചായത്തിന്റെ പടിഞ്ഞാറന്‍ പ്രദേശങ്ങളായ തുരുത്തി, കാരിയില്‍, മീന്‍കടവ്, മയ്യിച്ച പടിഞ്ഞാറ്, കുറ്റിവയല്‍, കുണ്ടുപടന്ന, കിഴക്കേമുറി തുടങ്ങിയ പ്രദേശങ്ങളിലുള്ളവര്‍ നിലവില്‍ അനുഭവിക്കുന്ന യാത്രാക്ലേശത്തിനു പരിഹാരം കാണുക എന്ന ലക്ഷ്യത്തോടെയാണ് അടിപ്പാത നിര്‍മിക്കുന്നത്. മയിച്ച റെയില്‍വേ സബ്‌വേ നിര്‍മാണം തകൃതിയായി നടക്കുന്നുണ്ട്. പി കരുണാകരന്‍ എം.പിയുടെ ഇടപെടലിന്റെ ഭാഗമായാണ് ഇവിടെ അടിപ്പാത അനുവദിക്കുകയും പ്രവൃത്തികള്‍ വേഗത്തില്‍ ആരംഭിക്കുകയും ചെയ്തത്.
മുന്‍ എം.എല്‍.എ കെ കുഞ്ഞിരാമന്റെ ആസ്തി വികസന ഫണ്ടില്‍ നിന്നു നിര്‍മാണത്തിനാവശ്യമായ തുകയും ചെറുവത്തൂര്‍ പഞ്ചായത്ത് സെന്റേജ് ചാര്‍ജും നല്‍കിയിരുന്നു. അനുബന്ധ റോഡ് കടന്നു പോകുന്നതിനായി നാട്ടുകാരുടെ നേതൃത്വത്തിലുള്ള കമ്മിറ്റി സ്വകാര്യ വ്യക്തികളുടെ ഭൂമി ഏറ്റെടുത്തിരിക്കുകയാണ്. പ്രദേശവാസികളുടെ അകമഴിഞ്ഞ സഹായവും പ്രവൃത്തിക്കു ലഭിക്കുണ്ട്. വാഹനങ്ങള്‍ക്കു സുഗമമായി കടന്നു പേകാനുള്ള രീതിയിലാണ് അടിപ്പാത നിര്‍മിക്കുന്നത്. ഇതിനാവശ്യമായ സ്ലാബുകളുടെ നിര്‍മാണമാണ് ഇപ്പോള്‍ പുരോഗമിക്കുന്നത്. സ്ലാബുകളുടെ നിര്‍മാണം പൂര്‍ത്തിയാകുന്നതോടെ ഇവ പാളത്തില്‍ ഉറപ്പിക്കുന്ന പ്രവൃത്തികള്‍ ആരംഭിക്കും.