തിരുവനന്തപുരം: സംസ്ഥാനത്ത് ഈ വര്‍ഷം പകര്‍ച്ചവ്യാധികള്‍ക്ക് സാധ്യത കൂടുതലെന്ന് ആരോഗ്യ മന്ത്രി കെ.കെ ശൈലജ. അതിനാല്‍ പൊതുജനങ്ങള്‍ ശ്രദ്ധിക്കണം. പകര്‍ച്ചവ്യാധി പ്രതിരോധത്തിനും നിയന്ത്രണത്തിനുമായി ആരോഗ്യ ജാഗ്രത എന്ന പേരില്‍ ആരോഗ്യവകുപ്പ് നടത്തുന്ന പ്രവര്‍ത്തനങ്ങളുടെ ഉദ്ഘാടനവുമായി ബന്ധപ്പെട്ട് വിളിച്ചുചേര്‍ത്ത വാര്‍ത്താസമ്മേളനത്തില്‍ സംസാരിക്കുകയായിരുന്നു അവര്‍.
ഡെങ്കിപ്പനി, എച്ച്1 എന്‍1 എന്നിവ പടരാന്‍ സാധ്യതയുണ്ടെന്നാണ് ഭയപ്പെടുന്നത്. ജൂണ്‍, ജൂലൈ മാസങ്ങളില്‍ നിപ്പയെ കരുതിയിരിക്കണം. ആരോഗ്യ ജാഗ്രതാ പ്രവര്‍ത്തനങ്ങളുടെ പുരോഗതി നിരീക്ഷിക്കാന്‍ ജില്ലാ കലക്ടര്‍മാരുടെ യോഗം 25ന് വിളിച്ചുചേര്‍ക്കും. ആരോഗ്യ ജാഗ്രത 2020ന്റെ സംസ്ഥാനതല ഉദ്ഘാടനം നാളെ വൈകിട്ട് അഞ്ചിന് ജിമ്മി ജോര്‍ജ് ഇന്‍ഡോര്‍ സ്റ്റേഡിയത്തില്‍ മുഖ്യമന്ത്രി പിണറായി വിജയന്‍ നിര്‍വഹിക്കുമെന്നും അവര്‍ പറഞ്ഞു.