ന്യൂഡല്‍ഹി: നേപ്പാളിലെ റിസോര്‍ട്ടില്‍ വിഷപ്പുക ശ്വസിച്ച് മരിച്ച മലയാളികളുടെ മൃതദേഹങ്ങള്‍ നാട്ടിലെത്തിക്കാനുള്ള ചിലവ് വഹിക്കാനാകില്ലെന്ന് ഇന്ത്യന്‍ എംബസി അധികൃതര്‍. ഇതുമായി ബന്ധപ്പെട്ട് കേന്ദ്രസര്‍ക്കാരിന്റെ നിര്‍ദേശങ്ങളൊന്നും ലഭിച്ചിട്ടില്ലെന്നാണ് അധികൃതര്‍ നല്‍കുന്ന വിശദീകരണം.

ഏതെങ്കിലും തരത്തിലുള്ള സാമ്പത്തിക സഹായം അനുവദിക്കണമെന്ന് ആരും ആവശ്യപ്പെട്ടിട്ടില്ലെന്നാണ് വിദേശകാര്യമന്ത്രാലയത്തിന്റെ മറുപടി. അതേസമയം മൃതദേഹങ്ങള്‍ നാട്ടിലെത്തിക്കുന്നതിനുള്ള മുഴുവന്‍ ചിലവും സംസ്ഥാന സര്‍ക്കാര്‍ വഹിക്കുമെന്ന് മുഖ്യമന്ത്രി പിണറായി വിജയന്‍ വ്യക്തമാക്കി. മുഖ്യമന്ത്രിയുടെ ഓഫിസ് ഇടപെട്ട് നോര്‍ക്ക വഴി ആവശ്യമായ ചിലവ് വഹിക്കുമെന്ന് അറിയിക്കുകയായിരുന്നു. എട്ട് മുതല്‍ പത്ത് ലക്ഷം രൂപ വരെ ഇതിനായി വേണ്ടി വരുമെന്ന് എയര്‍ ഇന്ത്യ അധികൃതര്‍ അറിയിച്ചു.

അതേസമയം മൃതദേഹം നാട്ടിലെത്തിക്കാനുള്ള അനിശ്ചിതത്വം അവസാനിച്ചു. എട്ടുപേരുടെയും മൃതദേഹങ്ങള്‍ വ്യാഴാഴ്ച ഇന്ത്യയിലെത്തിക്കും. തിരുവനന്തപുരം സ്വദേശികളുടെ മൃതദേഹങ്ങള്‍ രാവിലെ പതിനൊന്നോടെ ഡല്‍ഹിയിലെത്തിച്ച് പിന്നീട് രാത്രിയോടെ സ്വന്തം നാട്ടിലേക്ക് വിമാനമാര്‍ഗം എത്തിക്കും. കോഴിക്കോട് സ്വദേശികളുടെ മൃതദേഹങ്ങള്‍ വെള്ളിയാഴ്ച രാവിലെയോടെയാണ് സ്വന്തം നാട്ടിലെത്തിക്കാനാവുക.