ദോഹ: 2022 ഫിഫ ലോകകപ്പിനായുള്ള തുമാമ സ്‌റ്റേഡിയത്തിന്റെ പ്രധാന നിര്‍മാണ കരാര്‍ ഖത്തര്‍തുര്‍ക്കി സംയുക്ത കമ്പനിക്ക്. വമ്പന്‍ ഖത്തരി നിര്‍മാണകമ്പനിയായ അല്‍ജാബര്‍ എന്‍ജിനീയര്‍ എല്‍എല്‍സി(ജെഇസി)യും പ്രമുഖ തുര്‍ക്കിഷ് കമ്പനിയായ ടെക്‌ഫെന്‍ കണ്‍സ്ട്രക്ഷനും ചേര്‍ന്നുള്ള സംയുക്ത സംരംഭത്തിനായിരിക്കും തുമാമ സ്റ്റേഡിയത്തിന്റെ നിര്‍മണച്ചുമതല. ഫിഫ ലോകകപ്പ് നടത്തിപ്പിന്റെ ചുമതലയുള്ള സുപ്രീം കമ്മിറ്റി ഫോര്‍ ഡെലിവറി ആന്റ് ലെഗസിയാണ് ഇക്കാര്യം പ്രഖ്യാപിച്ചത്.

തുമാമ സ്റ്റേഡിയത്തിന്റെ രൂപകല്‍പന ചുമതല ഖത്തറിലെ പഴക്കമേറിയ എന്‍ജിനീയറിങ് കണ്‍സള്‍ട്ടിങ് കമ്പനിയായ അറബ് എന്‍ജിനീയറിങ് ബ്യൂറോക്ക് 2015ല്‍ അനുവദിച്ചിരുന്നു. 2022ലെ ലോകകപ്പ് ചാമ്പ്യന്‍ഷിപ്പിന്റെ ക്വാര്‍ട്ടര്‍ ഫൈനല്‍ വരെയുള്ള മത്സരങ്ങള്‍ക്ക് വേദിയാകുന്ന തുമാമയിലെ സ്റ്റേഡിയത്തിന് 40,000 ആളുകളെ ഉള്‍ക്കൊള്ളാന്‍ കഴിയും. ചാമ്പ്യന്‍ഷിപ്പിന് ശേഷം സീറ്റുകള്‍ 20,000 ആക്കിക്കുറക്കും. നാല് ഔട്ട് ഡോര്‍ പിച്ചുകളടക്കം 515,400 ചതുരശ്ര മീറ്ററിലാണ് സ്റ്റേഡിയം നിര്‍മിക്കുന്നത്. ഹമദ് രാജ്യാന്തര വിമാനത്താവളത്തില്‍ നിന്നും മിനിറ്റുകള്‍ക്കകം തുമാമ സ്റ്റേഡിയത്തിലെത്താം. ദോഹയിലെ നഗരവികസനത്തിന്റെ കേന്ദ്രം കൂടിയാണ് തുമാമ. 2020ല്‍ സ്റ്റേഡിയം നിര്‍മാണം പൂര്‍ത്തീകരിക്കാനാണ് ലക്ഷ്യമിടുന്നത്. തുമാമ സ്റ്റേഡിയത്തിന്റെ പ്രധാന കരാര്‍ ഖത്തര്‍തുര്‍ക്കി സംയുക്ത സംരംഭത്തിന് നല്‍കാനായതില്‍ സന്തോഷമുണ്ടെന്ന് സുപ്രീംകമ്മിറ്റി സെക്രട്ടറി ജനറല്‍ ഹസന്‍ അല്‍ തവാദി പറഞ്ഞു. ദോഹയിലെ ദ്രുതഗതിയില്‍ വികസനം നടക്കുന്ന മേഖലകളിലൊന്നാണ് തുമാമ. സ്‌റ്റേഡിയം നിര്‍മാണവും ചുറ്റുമുള്ള വികസനവും പൂര്‍ത്തിയാകുന്നതോടെ ദോഹയിലെ കായികകേന്ദ്രമായി മാത്രമല്ല, കമ്യൂണിറ്റി ഡെസ്റ്റിനേഷനായും തുമാമ മാറും. ചരിത്രപരമായൊരു കായിക ടൂര്‍ണമെന്റിനായി സവിശേഷവും പൈതൃകകേന്ദ്രീകൃതവുമായ വിധത്തില്‍ സ്റ്റേഡിയം നിര്‍മാണം പൂര്‍ത്തിയാക്കാന്‍ ഖത്തര്‍തുര്‍ക്കിഷ് സംയുക്ത സംരംഭത്തിന് സാധിക്കുമെന്ന ആത്മവിശ്വാസവും ഉറപ്പുമുണ്ടെന്നും ഹസന്‍ അല്‍ തവാദി പറഞ്ഞു. ഫിഫ ലോകകപ്പ് ഒരുക്കങ്ങളുടെ കാര്യത്തിലെ മറ്റൊരു നാഴികക്കല്ലാണിതെന്ന് സുപ്രീംകമ്മിറ്റി ടെക്‌നിക്കല്‍ ഡെലിവറി ഓഫീസ് ചെയര്‍മാന്‍ എന്‍ജിനിയര്‍ ഹിലാല്‍ അല്‍ കുവാരി പറഞ്ഞു. ഇത്തരമൊരു പ്രാധാന്യമര്‍ഹിക്കുന്ന വികസനത്തിന് തങ്ങളില്‍ വിശ്വാസമേല്‍പ്പിച്ചതില്‍ നന്ദിയുണ്ടെന്ന് അല്‍ ജാബര്‍ എന്‍ജിനിയറിങ് കമ്പനി സിഇഒ ഒസമാ ഹദീദ് പറഞ്ഞു. ദോഹയിലെയും തുമാമമയിലെയും ജനങ്ങള്‍ക്ക് അഭിമാനകരമായ രീതിയിലായിരിക്കും സ്‌റ്റേഡിയം നിര്‍മാണം പൂര്‍ത്തിയാക്കുകയെന്നും ഹദീദ് പറഞ്ഞു. തുമാമ സ്റ്റേഡിയത്തിന്റെ പ്രാഥമിക നിര്‍മാണപ്രവര്‍ത്തനങ്ങള്‍ കഴിഞ്ഞവര്‍ഷം മധ്യത്തിലാണ് തുടങ്ങിയത്. ടൈം ഖത്തറാണ് പദ്ധതി നിയന്ത്രിക്കുന്നത്. ബൂം കണ്‍സ്ട്രക്ഷന്റെ നേതൃത്വത്തില്‍ നിരപ്പാക്കല്‍, ഗ്രേഡിങ് പ്രവര്‍ത്തികള്‍ പൂര്‍ത്തിയാക്കി. ഈ വര്‍ഷം തന്നെ സ്റ്റേഡിയത്തിന്റെ ഡിസൈന്‍ പുറത്തുവിടും.