കൊല്ലം: ചവറ ഐ.ആര്‍.ഇയുടെ കരിമണല്‍ ഖനനം മൂലം ഭൂപടത്തില്‍ നിന്നും മാഞ്ഞുതുടങ്ങിയ ആലപ്പാട്ടെ ഖനന പ്രദേശങ്ങളില്‍ ഒടുവില്‍ സര്‍ക്കാര്‍ ഇടപെടല്‍. പരിസ്ഥിതിലോല പ്രദേശത്ത് അനധികൃതമായി ഖനനം നടത്തുന്നെന്ന പരാതിയില്‍ ഇന്നലെമുതല്‍ റവന്യൂ വകുപ്പ് പരിശോധന തുടങ്ങി. തദ്ദേശ വാസികളുടെ നാളുകളായുള്ള പരാതിയിലാണ് നടപടി. പരിശോധനാ റിപ്പോര്‍ട്ട് അന്വേഷണ സംഘം കലക്ടര്‍ക്ക് കൈമാറും.
ആലപ്പാട്ടെ നാലാം ബ്ലോക്ക് അടക്കമുള്ള ഭാഗങ്ങളിലാണ് റവന്യൂ വകുപ്പ് പരിശോധന നടത്തിയത്. തണ്ണീര്‍ത്തടങ്ങളും കുടിവെള്ളവും അടക്കം നശിപ്പിക്കുന്ന ഖനനം നടത്തിയെന്നാണ് പ്രാഥമിക കണ്ടെത്തല്‍. കൂടാതെ മറ്റുള്ള ഭാഗങ്ങളിലും പരിശോധന നടത്തണമെന്നാണ് റവന്യൂ വകുപ്പിന്റെ തീരുമാനം. ആലപ്പാടിനെ രക്ഷിക്കണമെന്നാവശ്യപ്പെട്ടുള്ള സമരം 70 ദിവസത്തിലേക്ക് കടക്കുമ്പോഴാണ് അനധികൃത ഖനനത്തിനെതിരേ അധികൃതരുടെ കണ്ണ് തുറക്കുന്നത്.