ദമാം: വിഷന്‍ 2030 ന്റെ ഭാഗമായി സഊദിയിലെ പൊതുമേഖലാ സ്ഥാപനങ്ങളുടെ സ്വകാര്യവല്‍ക്കരണം ആരംഭിച്ചു. തപാല്‍ വകുപ്പാണ് ഇതില്‍ ആദ്യത്തേത്. അടുത്തവര്‍ഷം തുടക്കത്തില്‍ തപാല്‍ വകുപ്പ് സ്വകാര്യവല്‍ക്കരിക്കുമെന്ന് ടെലികമ്യൂണിക്കേഷന്‍ ആന്‍ഡ് ഐ.ടി മന്ത്രി മുഹമ്മദ് അല്‍ സുവൈലി വ്യക്തമാക്കി.

എന്നാല്‍, സ്വദേശികളും വിദേശികളുമായ ഷെയര്‍ ഹോള്‍ഡേഴ്‌സിനു അവസരങ്ങള്‍ നല്‍കുന്നതിനെക്കുറിച്ച് വ്യക്തത വന്നിട്ടില്ല. സ്വകാര്യ വ്യക്തികള്‍ക്ക് മുതല്‍ മുടക്കാനുള്ള സുവര്‍ണാവസരമാണിതെന്നും ഇതേക്കുറിച്ചുള്ള പഠനം നടക്കുകയാണെന്നും മന്ത്രി പറഞ്ഞു.

സ്വകാര്യവല്‍ക്കരണം നടത്തുക വഴി നിലവില്‍ നല്‍കുന്ന സബ്‌സിഡികള്‍ പൂര്‍ണമായും നിര്‍ത്തലാക്കിയേക്കും. സബ്‌സിഡി 2020 ഓടെ പൂജ്യമായി കുറക്കാനാകുമെന്നാണ് അധികൃതര്‍ കണക്കാക്കുന്നത്. 2.75 ബില്ല്യന്‍ റിയാലിന്റെ വരുമാനമാനവും പോസ്റ്റല്‍ മേഖലയില്‍ നിന്നു ലക്ഷ്യമിടുന്നുണ്ട്. നിലവില്‍ പതിനായിരത്തോളം തൊഴിലാളികളാണ് സഊദി പോസ്റ്റില്‍ ജോലി ചെയ്യുന്നത്.