കോഴിക്കോട്: എനിക്ക് മാത്രമേ എല്ലാ കാര്യവും കൃത്യമായി ചെയ്യാന്‍ കഴിയൂ എന്ന ധാരണയാണ് മോദിയ്ക്കുള്ളതെന്ന് ഗുജറാത്ത് മുന്‍ ഡി.ജി.പി ആര്‍.ബി ശ്രീകുമാര്‍. അദ്ദേഹത്തിന്റെ പുസ്തകമായ  'ഗുജറാത്ത്: ബിഹൈന്‍ഡ് ദ കര്‍ട്ടനെ'ക്കുറിച്ചുള്ള ചര്‍ച്ചയില്‍ സംസാരിക്കുകയായിരുന്നു അദ്ദേഹം. ജനങ്ങള്‍ക്ക് സമര്‍പ്പിച്ച കുറ്റപത്രമാണ് തന്റെ പുസ്തകം. സ്വന്തം ലാഭത്തിന് വേണ്ടി എന്തും ചെയ്യുന്ന ഉദ്യോഗസ്ഥ വര്‍ഗമാണ് രാജ്യത്ത് വളര്‍ന്നു വരുന്നത്. സര്‍വമത വിശ്വാസമാണ് നമ്മുടെ സമൂഹത്തില്‍ വളര്‍ന്നു വരേണ്ടത്. ഉദ്യോഗസ്ഥരാണ് പ്രശ്‌നങ്ങള്‍ ഉണ്ടാകുമ്പോള്‍  ഒത്താശ ചെയ്യുന്നതെന്നും അദ്ദേഹം പറഞ്ഞു.
അളകാപുരിയില്‍ നടന്ന ചടങ്ങ് വി.കെ.സി മമ്മദ് കോയ എം.എല്‍.എ ഉദ്ഘാടനം ചെയ്തു. രാഷ്ട്രീയക്കാര്‍ പോലും കാണിക്കാത്ത ധൈര്യമാണ് ആര്‍.ബി ശ്രീകുമാര്‍ കാണിച്ചതെന്ന് വി.കെ.സി പറഞ്ഞു. ഡോ. കെ. സുരേഷ് കുമാര്‍ പുസ്തകം പരിചയപ്പെടുത്തി. സെക്യുലര്‍ കലക്ടീവ് പ്രസിഡന്റ് ഡോ. കെ. ഗോപാലന്‍ കുട്ടി അധ്യക്ഷനായി. ദയാപുരം വിദ്യാഭ്യാസ സാംസ്‌കാരിക കേന്ദ്രം രക്ഷാധികാരി സി.ടി അബ്ദുറഹീം, ബാങ്ക്‌മെന്‍സ് ക്ലബ് പ്രസിഡന്റ് കെ.ജെ തോമസ് സംസാരിച്ചു. സെക്യുലര്‍ കലക്ടീവ്,ബാങ്ക്‌മെന്‍സ് ക്ലബും കേളു ഏട്ടന്‍ പഠനകേന്ദ്രവും സംയുക്തമായാണ് പരിപാടി സംഘടിപ്പിച്ചത്.