ഹേഗ്: റോഹിംഗ്യന്‍ മുസ്‌ലിംകള്‍ക്കെതിരേ നടക്കുന്ന വംശഹത്യാ ആക്രമണങ്ങള്‍ തടയാന്‍ മ്യാന്‍മര്‍ ഭരണകൂടം അടിയന്തര നടപടി സ്വീകരിക്കണമെന്ന് അന്താരാഷ്ട്ര നീതിന്യായ കോടതി (ഐ.സി.ജെ). മുന്‍ കാലങ്ങളില്‍ നടന്ന കുറ്റകൃത്യങ്ങളുടെ തെളിവുകള്‍ നശിപ്പിക്കരുതെന്നും യു.എന്‍ പരമോന്നത കോടിതി നിര്‍ദേശിച്ചു.
കോടതി ഉത്തരവ് നടപ്പാക്കുന്നതിനായി എന്തെല്ലാം നടപടികളെടുത്തു എന്നതിനെപ്പറ്റി നാലു മാസത്തിനകം റിപ്പോര്‍ട്ട് നല്‍കണമെന്നും ഐ.സി.ജെ പ്രസിഡന്റായ ജഡ്ജി അബ്ദുല്‍ ഖ്വാവി അഹമ്മദ് യൂസഫ് നിര്‍ദേശിച്ചു. ആറു മാസം കൂടുംതോറും പുരോഗതി റിപ്പോര്‍ട്ട് കൈമാറണം. ഒരു മണിക്കൂറോളം നീണ്ട വാദപ്രതിവാദത്തിനു ശേഷം 17 അംഗ ജഡ്ജസ് പാനല്‍ ഐകകണ്‌ഠ്യേനയാണ് തീരുമാനമെടുത്തത്. ഐ.സി.ജെയുടെ നീക്കത്തെ മുഷ്യാവകാശ പ്രവര്‍ത്തകര്‍ സ്വാഗതം ചെയ്തു.
റോഹിംഗ്യകള്‍ക്കെതിരായ കുറ്റകൃത്യങ്ങള്‍ തടയുന്നതിനുള്ള ശക്തമായ നടപടിയാണിതെന്ന് ഹ്യൂമന്‍ റൈറ്റ്‌സ് വാച്ചിന്റെ പരംപ്രീത് സിങ് പറഞ്ഞു. സാമാധാനത്തിനുള്ള നോബല്‍ അവാര്‍ഡ് ജേതാവായ മ്യാന്‍മര്‍ ഭരണാധികാരി ഓങ്‌സാന്‍ സൂക്കി വംശഹത്യ തടയാന്‍ ഇടപെടാത്തത് രാജ്യാന്തരതലത്തില്‍ വന്‍ വിമര്‍ശനങ്ങള്‍ക്കിടയാക്കിയിരുന്നു. മ്യാന്‍മര്‍ സൈന്യത്തിന്റെയും ബുദ്ധരുടെയും വംശീയ ഉന്‍മൂലന നടപടികള്‍ കാരണം എട്ടു ലക്ഷത്തിലധികം റോഹിംഗ്യന്‍ മുസ്‌ലിംകളാണ് മ്യാന്‍മറിലെ റാഖൈനില്‍നിന്നു പലായനം ചെയ്തിരുന്നത്. മ്യാന്‍മറിനെതിരേ നടപടി ആവശ്യപ്പെട്ട് ആഫ്രിക്കന്‍ രാജ്യമായ ഗാംബിയ ആണ് ഐ.സി.ജെയെ സമീപിച്ചത്.