ന്യൂഡല്‍ഹി: വിജേന്ദര്‍ സിങുമായി ഏപ്രില്‍ ഒന്നിന് നടക്കേണ്ടിയിരുന്ന മത്സരത്തില്‍ നിന്ന് ചൈനയുടെ സുല്‍ഫിക്കര്‍ മൈമൈതിയാലി പിന്‍മാറി. എന്നാല്‍ പിന്‍മാറാനുള്ള കാരണം സുല്‍ഫിക്കര്‍ വ്യക്തമാക്കിയിട്ടില്ല. എന്നാല്‍ ഇതേ ദിവസത്തില്‍ മറ്റൊരു എതിരാളിയെ വിജേന്ദര്‍ നേരിടും.
വിജേന്ദര്‍-സുല്‍ഫിക്കര്‍ സൂപ്പര്‍ മിഡില്‍ വെയ്റ്റ് മത്സരം ഇരട്ട കിരീടത്തിനുള്ള മത്സരം കൂടിയായിരുന്നു. ഏഷ്യാ-പസഫിക്ക് ചാംപ്യനാണ് വിജേന്ദര്‍. സുല്‍ഫിക്കര്‍ ഡബ്ല്യു.ബി.ഒ ഓറിയന്റല്‍ ജേതാവാണ്. ഈ മത്സരത്തില്‍ ജയിക്കുന്നവര്‍ക്ക് രണ്ട് കിരീടവും സ്വന്തമാക്കാനാവുമായിരുന്നു.
വിജേന്ദറിന്റെ സ്‌പോണ്‍സര്‍മാരായ ഐ.ഒ.എസ് ബോക്‌സിങ് പ്രമോഷന്‍സ് സുല്‍ഫിക്കറിന്റെ പിന്‍മാറ്റത്തിന്റെ കാരണമെന്താണെന്നറിയില്ലെന്ന് പ്രതികരിച്ചു. എന്നാല്‍ ഈ വര്‍ഷം തന്നെ അദ്ദേഹം വിജേന്ദറുമായി മത്സരിക്കുമെന്ന് അറിയിച്ചിട്ടുണ്ടെന്ന് ഐ.ഒ.എസ് വക്താവ് അറിയിച്ചു. സുല്‍ഫിക്കറിന്റെ അഭാവത്തില്‍ സ്‌പോണ്‍സര്‍മാര്‍ മറ്റൊരു താരത്തിനായുള്ള പരിശ്രമത്തിലാണ്. അതേസമയം മത്സരിക്കാതിരിക്കാന്‍ ചൈനീസ് താരത്തിന് കാരണങ്ങളുണ്ടാകാമെന്നും അത് കാര്യമാക്കുന്നില്ലെന്നും വിജേന്ദര്‍ പറഞ്ഞു. മറ്റൊരു എതിരാളിക്കായി കാത്തിരിക്കുകയാണെന്നും വിജേന്ദര്‍ കൂട്ടിച്ചേര്‍ത്തു.