കൊച്ചി: ഭക്ഷ്യഭദ്രതാ നിയമപ്രകാരം ലഭിക്കുന്ന റേഷന്‍ ഭക്ഷ്യധാന്യത്തിന്റെ വില ജൂലായ് ഒന്നു മുതല്‍ കൂട്ടാനുള്ള കേന്ദ്ര സര്‍ക്കാര്‍ നടപടിയും സൗജന്യ റേഷന്‍ നിര്‍ത്തലാക്കാനുള്ള സംസ്ഥാന സര്‍ക്കാര്‍ നീക്കവും പുനഃപരിശോധിക്കണമെന്ന് ആവശ്യപ്പെട്ട് ഏപ്രില്‍ മൂന്നിന് റേഷന്‍ വ്യാപാരികള്‍ അഖിലേന്ത്യാ പണിമുടക്ക് നടത്തുമെന്ന് ഓള്‍ ഇന്ത്യാ റേഷന്‍ ഡീലേഴ്‌സ് അസോസിയേഷന്‍ ദേശീയ ജനറല്‍ സെക്രട്ടറി ബേബിച്ചന്‍ മുക്കാടന്‍ പറഞ്ഞു.
ഭക്ഷ്യഭദ്രതാ നിയമമനുസരിച്ച് മൂന്നുരൂപ നിരക്കില്‍ അരിയും, രണ്ടുരൂപാ നിരക്കില്‍ ഗോതമ്പും മൂന്നു വര്‍ഷത്തേക്കു മാത്രമേ നല്‍കുകയുള്ളൂ എന്ന് കേന്ദ്ര സര്‍ക്കാര്‍ 2013 ല്‍ പാസാക്കിയ നിയമത്തില്‍ തന്നെ വ്യക്തമാക്കിയിരുന്നു. കാലാവധി കഴിഞ്ഞതിനാലാണ് 2017 ജൂലൈ മുതല്‍ വില കൂട്ടുമെന്ന് കേരളത്തിനു മുന്നറിയിപ്പു നല്‍കിയത്. കേന്ദ്രം ഭക്ഷ്യധാന്യ വില വര്‍ധിപ്പിച്ചാല്‍ കേരളം മൂന്നു രൂപയുടെ അരിക്ക് എട്ട് രൂപ 30 പൈസ നല്‍കേണ്ടിവരും. ഇതുമൂലം 2400 കോടി രൂപയുടെ ബാധ്യത സംസ്ഥാന സര്‍ക്കാരിനുണ്ടാകും. അതിനാല്‍ സൗജന്യ റേഷന്‍ നിര്‍ത്തലാക്കാനാണ് സംസ്ഥാന സര്‍ക്കാര്‍ നീക്കം. സംസ്ഥാന ബജറ്റില്‍ ഭക്ഷ്യസബ്‌സിഡിക്കായി കൂടുതല്‍ തുക മാറ്റി സൗജന്യറേഷന്‍ പദ്ധതി തുടരണമെന്ന് ബേബിച്ചന്‍ ആവശ്യപ്പെട്ടു. കേന്ദ്രസര്‍ക്കാര്‍ നീക്കത്തിനെതിരേയുള്ള സമരത്തില്‍ ഇന്ത്യയിലെ അഞ്ചര ലക്ഷത്തോളം റേഷന്‍കടകളും അടച്ചിട്ട് പങ്കെടുക്കുമെന്ന് ബേബിച്ചന്‍ മുക്കാടന്‍ അറിയിച്ചു.