വടകര: മോട്ടോര്‍ ബൈക്കില്‍ കടത്തുകയായിരുന്ന കഞ്ചാവുമായി വടകരയില്‍ രണ്ടുപേര്‍ അറസ്റ്റില്‍. തിരുവള്ളൂര്‍ നാറാണത്ത് താമസിക്കും ചക്കാലയില്‍ അര്‍ഷാദ് (36), തോടന്നൂര്‍ കനകകുളത്തില്‍ ഭാസ്‌കരന്‍ (50) എന്നിവരെയാണു വടകര എക്‌സൈസ് സര്‍ക്കിള്‍ ഇന്‍സ്‌പെക്ടര്‍ പി. അനില്‍കുമാറിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. ഇവരില്‍ നിന്ന് ഒന്നര കിലോ കഞ്ചാവും എന്‍ഫീല്‍ഡ് ബുള്ളറ്റും കസ്റ്റഡിയിലെടുത്തു. വിദ്യാര്‍ഥികളെ ലക്ഷ്യമിട്ടു വില്‍പനയ്‌ക്കെത്തിച്ചതാണ് കഞ്ചാവ്.
വാഹന കച്ചവടത്തിന്റെ മറവില്‍ ബംഗളൂരുവില്‍ നിന്നാണു സംഘം കഞ്ചാവ് എത്തിച്ചത്.
തോടന്നൂരിലേക്ക് കഞ്ചാവ് കൊണ്ടുപോകുന്നതിനിടയില്‍ കുട്ടോത്ത് നായനാര്‍ ഭവനു സമീപം വാഹനപരിശോധനയ്ക്കിടയിലാണു പ്രതികള്‍ പിടിയിലായത്.
പ്രിവന്റിവ് ഓഫിസര്‍മാരായ എം.കെ മോഹന്‍ദാസ്, എന്‍.കെ വിനോദന്‍, സിവില്‍ എക്‌സൈസ് ഓഫിസര്‍മാരായ രാഗേഷ് ബാബു, പി.പി ഷൈജു, കെ.എന്‍ ജിജു, സി.എം സുരേഷ്‌കുമാര്‍, വിനീത്, ടി. വിശ്വനാഥന്‍ എന്നിവരും എക്‌സൈസ് സംഘത്തില്‍ ഉണ്ടായിരുന്നു.
വടകര ജുഡിഷ്യല്‍ ഫസ്റ്റ്ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതികളെ രണ്ടാഴ്ചത്തേക്ക് റിമാന്‍ഡ് ചെയ്തു.