നിസാം കെ. അബ്ദുല്ല

കല്‍പ്പറ്റ: കുറഞ്ഞ ചെലവില്‍ ഉലകം ചുറ്റാനുള്ള ആശയത്തിന്റെ പിന്നാലെ പോയി വിദ്യാര്‍ഥികളെത്തിയത് സൈക്കിളിനടുത്ത്.
പരീക്ഷണടിസ്ഥാനത്തില്‍ അവര്‍ നടത്തിയ രണ്ട് ദിവസത്തെ് യാത്രക്ക് ഒരാള്‍ക്ക് ആകെ ചെലവായത് 500രൂപയില്‍ താഴെ മാത്രം. ഒപ്പം ലഭിച്ചത് 250ഓളം കിലോമീറ്റര്‍ കുന്നുംമലയും ചവിട്ടിക്കയറിതിന്റെ ഊര്‍ജ്ജവും. ഇത്തിരി സൈക്കിള്‍ ഭ്രമം കൂടി ഉണ്ടായിരുന്ന മലപ്പുറം ഗവ. ആര്‍ട്‌സ് ആന്‍ഡ് സയന്‍സ് കോളജിലെ വിദ്യാര്‍ഥികളാണ് പരീക്ഷണാടിസ്ഥാനത്തില്‍ പണിമുടക്ക് ദിവസത്തില്‍ വയനാടന്‍ ചുരം കയറിയത്.
ചൊവ്വാഴ്ച പുലര്‍ച്ചെ മുണ്ടുപറമ്പ് കോളജ് ക്യാംപസിനടുത്ത് നിന്ന് ആരംഭിച്ച സൈക്കിള്‍ റൈഡ് ചുരം കയറി വയനാടിന്റെ മുക്കിലും മൂലയിലും സന്ദര്‍ശനം നടത്തിയാണ് ഇന്നലെ വൈകിട്ടോടെ ചുരമിറങ്ങിയത്.
ഇറങ്ങുന്ന വഴി തുശാരഗിരി വെള്ളച്ചാട്ടവും സന്ദര്‍ശിച്ചാണ് കുട്ടികള്‍ നാട് പിടിച്ചത്. മേല്‍മുറി സ്വദേശിയും കോളജില്‍െ ബികോം രണ്ടാംവര്‍ഷ വിദ്യാര്‍ഥിയുമായ മുഹമ്മദ് റമീസ്, പെരുന്തല്‍മണ്ണ സ്വദേശിയും ബികോം രണ്ടാംവര്‍ഷ വിദ്യാര്‍ഥിയുമായ മുഹമ്മദ് സഫീര്‍, നീലഗിരി പന്തല്ലൂര്‍ സ്വദേശിയും ബി.എ ഇസ്‌ലാമിക് ഹിസ്റ്ററി രണ്ടാംവര്‍ഷ വിദ്യാര്‍ഥിയുമായ യാസര്‍ അറഫാത്ത്, ഒന്നാംവര്‍ഷ ബി.എസ്.സി കെമിസ്ട്രി വിദ്യാര്‍ഥിയും വടക്കേമണ്ണ സ്വദേശിയുമായ ജലാലുദ്ധീന്‍, അറബിക് അവസാനവര്‍ഷ വിദ്യാര്‍ഥികളായ സിവില്‍സ്റ്റേഷന്‍ സ്വദേശി മഷ്ഹൂദ്, വറ്റല്ലൂര്‍ സ്വദേശി ഷുഹൈബ് എന്നിവരാണ് പോക്കറ്റ് കാലിയാകാതെ മലപ്പുറത്ത് നിന്നും സൈക്കിളുമായെത്തി ചുരം കയറി വയനാടിന്റെ പ്രകൃതിഭംഗി ആവോളം ആസ്വദിച്ച് മടങ്ങിയത്. യാത്രയെ അത്രകണ്ട് ഇഷ്ടപ്പെടുന്നവരാണ് ഈ കുട്ടികളത്രയും. വ്യത്യസ്ത വഴികളിലൂടെ യാത്രകളോടാണ് ഇവര്‍ക്ക് താല്‍പര്യം.
അതുകൊണ്ട് തന്നെയാണ് ഇത്തരത്തിലുള്ള പരീക്ഷണങ്ങള്‍ ഇവര്‍ നടത്തുന്നതും. പ്രകൃതിയെ അറിഞ്ഞും പഠിച്ചും യാത്രയില്‍ പലയിടങ്ങളിലും നാട്ടുകാരില്‍ നിന്നും ലഭിച്ച സ്വീകരണങ്ങളൊന്നും മനസില്‍ നിന്ന് മായില്ലെന്നാണ് ഇവര്‍ പറയുന്നത്.
യാത്രയില്‍ പങ്കെടുത്തവരില്‍ സൈക്കിള്‍ സ്വന്തമായുള്ളത് രണ്ട് പേര്‍ക്കാണ്. മറ്റുള്ളവര്‍ സുഹൃത്തുക്കളില്‍ നിന്നും കടം വാങ്ങിയാണ് യാത്രക്ക് പോന്നത്.  തങ്ങള്‍ നടത്തിയ യാത്രയെക്കുറിച്ച് സഹപാഠികളെ കൂടി ബോധവല്‍ക്കരിച്ച് കോളജില്‍ സൈക്കിള്‍ സവാരി പ്രോത്സാഹിപ്പിക്കാനുള്ള പ്രവര്‍ത്തനങ്ങള്‍ക്ക് ചുക്കാന്‍ പിടിക്കണമെന്നാണ് ഇവരുടെ ഇപ്പോഴത്തെ ആഗ്രഹം.