പേരാവൂര്‍: കോളയാട് പെരുവയ്ക്ക് സമീപം കന്നിക്കോട്ട് മലയിലെ കൊളപ്പ വെള്ളച്ചാട്ടം സഞ്ചാരികളുടെ മനംകവരുന്നു. കോളയാട് നിന്നു പെരുവ വഴി 10 കിലോമീറ്റര്‍ കാനന പാതയിലൂടെ സഞ്ചരിച്ചാല്‍ ഇവിടെയെത്താം. കൊളപ്പ വെള്ളച്ചാട്ടത്തിലേക്കു പോകുന്ന വഴിയില്‍ എടയാറിനു സമീപം ചങ്ങലഗേറ്റില്‍ തകര്‍ക്കപ്പെട്ട കാനന ക്ഷേത്രമുണ്ട്. ഇവിടെ കയറിയാല്‍ മനോഹരമായ കൊത്തുപണികളോടു കൂടിയ പുരാതന ശില്‍പങ്ങള്‍ ആവോളം ആസ്വദിക്കാമെന്നതും സഞ്ചാരികളെ ഇങ്ങോട്ടേക്ക് ആകര്‍ഷിക്കുന്നു.
വഴിയിലെ തെളിനീരൊഴുകുന്ന തോടുകളും പക്ഷികളുടെ ശബ്ദവും വനഭംഗിയും യാത്രയ്ക്കു വ്യത്യസ്തമായ അനുഭവം പകരും. വെള്ളച്ചാട്ടത്തിനു ഒന്നര കിലോമീറ്റര്‍ അകലെ ടാറിങ് റോഡ് അവസാനിക്കും. തുടര്‍ന്നു കുത്തനെയുള്ള ഇറക്കങ്ങളും കയറ്റങ്ങളുമാണു സഞ്ചാരികളെ കാത്തിരിക്കുന്നത്. ഇതു യാത്രയ്ക്കു ട്രക്കിങ് അനുഭൂതി നല്‍കും. തുടര്‍ന്നങ്ങോട്ടുള്ള യാത്രയില്‍ വഴിനീളെ പഴശ്ശി രാജയുടെ പട നയിച്ച കുറിച്യരുടെ ഭവനങ്ങളാണ്. യാത്രയില്‍ എന്തെങ്കിലും സംശയങ്ങള്‍ ഉണ്ടെങ്കില്‍ ഇവരുടെ സഹായം തേടിയാല്‍ മതി. മണ്‍റോഡ് അവസാനിക്കുന്നിടത്തു നിന്നും 500 മീറ്റര്‍ നടവഴി മാത്രമുള്ള കൊടുംകാട്ടിലൂടെ ദുര്‍ഘടമായ വഴിയിലൂടെ സഞ്ചരിച്ചാല്‍ നിങ്ങള്‍ക്കു കന്നിക്കോട്ട് മലയുടെ താഴ്‌വാരത്ത് എത്താം.
ഇവിടെ നിങ്ങളെ കാത്തിരിക്കുന്നതു 200 അടി ഉയരത്തില്‍ നിന്നു താഴേക്കു പതിക്കുന്ന മനോഹരമായ വെള്ളച്ചാട്ടമാണ്. തട്ടുതട്ടുകളായിട്ട് കുത്തനെയാണു വെള്ളത്തിന്റെ പതനം. ഇവിടേക്കു പ്രവേശിക്കാന്‍ അല്‍പം ബുദ്ധിമുട്ട് ആയതുകൊണ്ടുതന്നെ അധികമാരും വരാന്‍ ധൈര്യപ്പെടാറില്ല. അതിനാല്‍ കാടിന്റെ സ്വച്ഛത ആസ്വദിക്കാന്‍ ഇതിലും നല്ല വേറൊരിടമില്ല. സമീപ പ്രദേശങ്ങളില്‍ ഉള്ളതില്‍ വച്ച് ഏറ്റവും വലുതും മനോഹരവുമായ വെള്ളച്ചാട്ടമാണു കൊളപ്പ. ഏതു വേനല്‍ക്കാലത്തും വറ്റാത്ത സമൃദ്ധമായ നീരുറവയാണ് ഇവിടുത്തെ സവിശേഷത.