റിയാദ്: രാജ്യത്തിന്റെ സുരക്ഷക്കെതിരായി പ്രവര്‍ത്തനം നടത്തിയതിനെത്തുടര്‍ന്ന് നാല് സ്വദേശികള്‍ ഉള്‍പ്പെടെ ആറു പേരെ സഊദി ആഭ്യന്തര മന്ത്രാലയം പിടികൂടി. നാലു സഊദി പൗരന്മാരും യു.എ.ഇ, ഫലസ്തീന്‍ രാജ്യങ്ങളിലെ ഓരോ പൗരന്മാരുമാണ് പിടിയിലായത്. ഇതോടെ തീവ്രവാദ പ്രവര്‍ത്തനവുമായി രാജ്യത്ത് പിടിയിലായവരുടെ എണ്ണം 5269 പേരായി. അടുത്തിടെ പിടികൂടപ്പെട്ടവര്‍ ബ്യൂറോ ഓഫ് ഇന്‍ വെസ്റ്റിഗേഷന്‍ ആന്‍ഡ് പബ്ലിക് പ്രോസിക്യൂഷന്റെ കീഴില്‍ അന്വേഷണം നേരിടുകയാണ്.

പിടികൂടിയവരുടെ വിവരങ്ങള്‍ സഊദി ആഭ്യന്തര മന്ത്രാലയത്തിന്റെ കീഴിലുള്ള തവാസുല്‍ വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്. പിടിക്കപ്പെട്ടവരുടെ കുടുംബങ്ങള്‍ക്കും കുറ്റവാളികള്‍ക്കുമിടയില്‍ കൂടുതല്‍ ബന്ധം സ്ഥാപിക്കാന്‍ വേണ്ടിയാണ് ഇത് ആരംഭിച്ചതെന്ന് അധികൃതര്‍ വ്യക്തമാക്കി. കുറ്റവാളികളെ സന്ദര്‍ശിക്കുവാനുള്ള അവസരം, പ്രത്യേക ആവശ്യങ്ങള്‍ക്ക് വേണ്ടിയുള്ള പരോള്‍, വക്കീലുമായി ബന്ധപ്പെടാനുള്ള അവസരം എന്നിവയ്ക്ക് വേണ്ടി ഇതിലൂടെ അപേക്ഷ നല്‍കി അനുമതി വാങ്ങാനാവുമെന്നു അധികൃതര്‍ വ്യക്തമാക്കി. തീവ്രവാദകേസുകള്‍ വളരെ ഗുരുതരമാണെന്നിരിക്കെ ഇവരോടുള്ള സമീപനം സുതാര്യമാക്കുകയാണ് സഊദി സര്‍ക്കാര്‍ ഇതുകൊണ്ട് ഉദ്ദേശിക്കുന്നത്.