മൊഗ്രാല്‍ പുത്തൂര്‍: ദേശീയ പണി മുടക്ക് ദിനത്തിലും വിശ്രമമില്ലാതെ സേവനത്തിലേര്‍പ്പെട്ടിരിക്കുകയാണ് മൊഗ്രാല്‍ പുത്തൂര്‍ പഞ്ചായത്ത് മുസ്‌ലിം യൂത്ത് ലീഗിന്റെ വൈറ്റ് ഗാര്‍ഡ് പ്രവര്‍ത്തകര്‍. ചൗക്കി ആസാദ് നഗറിലെ നിര്‍ദ്ധന കുടുംബത്തിന് നിര്‍മിക്കുന്ന വീടിന്റെ തറ മണ്ണ് ഇട്ട് നികത്തുന്ന പ്രവര്‍ത്തിയാണ് യൂത്ത് ലീഗ് വൈറ്റ് ഗാര്‍ഡ് (ദുരന്ത നിവാരണ സേന) പ്രവര്‍ത്തകര്‍ പണിമുടക്ക് ദിനത്തില്‍ ചെയ്ത് തീര്‍ത്തത്.
യൂത്ത് ലീഗ് യുവജന യാത്ര സമാപന വേദിയിലെ പ്രഖ്യാപനത്തോടെ പ്രദേശത്ത് വിവിധ പ്രവര്‍ത്തനങ്ങള്‍ ഏറ്റെടുത്ത് ചെയ്യ്തു തീര്‍ക്കുന്നതില്‍ വൈറ്റ് ഗാര്‍ഡ് ടീം ശ്രദ്ധ പതിപ്പിച്ചിരുന്നു. നേരത്തെ ആസാദ് നഗര്‍ പായിച്ചാല്‍ റോഡ് ഇവര്‍ ഗതാഗത യോഗ്യമാക്കിയിരുന്നു. ആസാദ് നഗറിലെ കേടായ തെരുവു വിളക്കുകള്‍ നന്നാക്കുകയും ആവശ്യമായ സ്ഥലങ്ങളില്‍ പുതിയത് സ്ഥാപിക്കുകയും ചെയ്തിട്ടുണ്ട്. യൂത്ത് ലീഗ് മൊഗ്രാല്‍ പുത്തൂര്‍ പഞ്ചായത്ത് പ്രസിഡന്റ് മുജീബ് കമ്പാര്‍ ഉദ്ഘാടനം ചെയ്തു. യൂത്ത് ലീഗ് പഞ്ചായത്ത് സെക്രട്ടറി നവാസ് എരിയാല്‍, വൈറ്റ് ഗാര്‍ഡ് അംഗങ്ങളായ മുജീബ് ലിബാസ്, ജാഫര്‍ കുദിറത്ത്, ഹാരിസ് എരിയാല്‍, അമീര്‍ കോട്ടക്കുന്ന്, അല്‍താഫ് ആസാദ്, മുഹമ്മദ്, അഹമ്മദ് എന്നിവര്‍ നേതൃത്വം നല്‍കി.