ദമ്മാം: കഴിഞ്ഞ ഒരു മാസത്തിനിടെ രാജ്യത്തിന്റെ പടിഞ്ഞാറന്‍ മേഖലകളില്‍ നിന്നായി പതിനായിരത്തോളം അനധികൃത താമസക്കാരെ അധികൃതര്‍ പിടികൂടി. മദീന, അല്‍ ഖസ്സീ എന്നീ പ്രവിശ്യകളില്‍ നിന്നാണ് ഇത്രയും ആളുകളെ പിടികൂടിയത്. മദീന പൊലിസ് പരിധിയില്‍ നിന്നു 6,996 അനധികൃത താമസക്കാരെയും അല്‍ ഖസ്സിം പരിധിയില്‍ നിന്നു 2,977 അനധികൃത താമാസക്കാരെയുമാണ് പിടികൂടിയതെന്ന് പൊലിസ് പറഞ്ഞു.

താമസരേഖ ശരിയല്ലാത്തവര്‍, രേഖയില്‍ അനുവദിക്കപ്പെട്ട തൊഴില്‍ മറികടന്നു മറ്റു തൊഴിലുകളില്‍ ഏര്‍പ്പെട്ടവര്‍, സ്‌പോന്‍സര്‍ മാറി തോഴിലെടുത്തവര്‍, അംഗീകാരമില്ലാതെ തൊഴിലുകളില്‍ ഏര്‍പ്പെട്ടവര്‍ തുടങ്ങിയവരെയാണ് പിടികൂടിയതെന്ന് മദീന പൊലിസ് മേധാവി അബ്ദുല്‍ ഹാദി അല്‍ ശഹ്‌റാനി വ്യക്തമാക്കി. പിടിയിലായവര്‍ ഇപ്പോള്‍ ജയിലുകളിലാണെന്നും ഓരോരുത്തരുടെയും നിയമ നടപടികള്‍ പൂര്‍ത്തിയാക്കി സ്വദേശങ്ങളിലേക്ക് കയറ്റി വിടുമെന്നും അദേഹം പറഞ്ഞു. വിവിധ വകുപ്പുകളുടെ സഹായത്തോടെയാണ് തിരച്ചില്‍ നടത്തുന്നത്.