പേരാമ്പ്ര: പള്ളിയത്ത്-ആവള വഴി കോഴിക്കോട്ടേക്ക് പോകുന്ന കെ.എസ്.ആര്‍.ടി.സി ബസ് ട്രിപ്പ് മുടക്കുന്നത് പതിവാകുന്നു.
രാവിലത്തെ ഒരു ട്രിപ്പ് ഒഴികെ ബാക്കി അഞ്ചു ട്രിപ്പുകള്‍ മുടങ്ങിയിരിക്കുയാണ്. ഇതു കാരണം പേരാമ്പ്രയില്‍ നിന്നു ആവള, പള്ളിയത്ത് എന്നിവിടങ്ങളിലേക്ക് പോകുന്ന നൂറുക്കണക്കിന് സ്‌കൂള്‍ വിദ്യാര്‍ഥികള്‍, മറ്റു വിവിധ സര്‍ക്കാര്‍ ഓഫിസുകളിലേക്കുള്ള ജീവനക്കാര്‍, ദൂരസ്ഥലങ്ങളിലേക്ക് പോകുന്ന യാത്രക്കാര്‍ തുടങ്ങിയവര്‍ ദുരിതമനുഭവിക്കുകയാണ്.
ഈ റൂട്ടില്‍ ചുരുക്കം ചില സ്വകാര്യ ബസുകളേ സര്‍വിസ് നടത്തുന്നുള്ളൂ. രാത്രികാലങ്ങളില്‍ ചെറുതും വലുതുമായ വാഹനങ്ങള്‍ ഒന്നും സര്‍വിസ് നടത്താത്ത ഈ റൂട്ടില്‍ യാത്രാക്ലേശം രൂക്ഷമാണ്. ആവളയിലേക്കുള്ള കെ.എസ്.ആര്‍.ടി.സി ബസ് പുന:സ്ഥാപിക്കാന്‍ അടിയന്തര നടപടികള്‍ സ്വീകരിക്കണമെന്ന് കേരള കോണ്‍ഗ്രസ് (ജേക്കബ്) ജില്ലാ സെക്രട്ടറി മനോജ് ആവള അധികൃതരോട് ആവശ്യപ്പെട്ടു.