ടെഹ്‌റാന്‍: ലോക വനിതാ ചെസ്സ് ചാംപ്യന്‍ഷിപ്പിലെ ഇന്ത്യന്‍ പ്രതീക്ഷ അവസാനിച്ചു. സെമി ഫൈനലില്‍ ദ്രോണവല്ലി ഹരിക ചൈനീസ് താരം ടാന്‍ സോങ്‌യിയോടു പൊരുതി വീണു. ടൈബ്രേക്കറിലേക്ക് നീണ്ട പോരാട്ടത്തിലാണു ഹരികയുടെ തോല്‍വി. സെമിയിലെ ആദ്യ ഗെയിമില്‍ തോല്‍വി നേരിട്ട ഹരിക രണ്ടാം ഗെയിമില്‍ വിജയം സ്വന്തമാക്കി മത്സരം ടൈ ബ്രേക്കറിലേക്ക് നീട്ടുകയായിരുന്നു. ടൈബ്രേക്കറിലെ നാലു ഗെയിമുകള്‍ ഇരു താരങ്ങളും രണ്ടു വീതം ജയങ്ങളുമായി ഒപ്പം നിന്നു. അഞ്ചാം ഗെയിം സമനിലയില്‍ അവസാനിച്ചതോടെ ആറാം ഗെയിം നിര്‍ണായകമായി. എന്നാല്‍ അവസാന ഗെയിമില്‍ പരാജയപ്പെട്ടത് ഹരികയ്ക്ക് തിരിച്ചടിയായി.