ഭുവനേശ്വര്‍: വിജയ് ഹസാരെ ട്രോഫി ഏകദിന പോരാട്ടത്തില്‍ കേരളത്തിനു തോല്‍വി. രണ്ടു വിക്കറ്റിനു ത്രിപുര കേരളത്തെ കീഴടക്കി.
ആദ്യം ബാറ്റു ചെയ്ത കേരളം നിശ്ചിത 50 ഓവറില്‍ ഒന്‍പതു വിക്കറ്റ് നഷ്ടത്തില്‍ 233 റണ്‍സെടുത്തപ്പോള്‍ ത്രിപുര 49.2 ഓവറില്‍ എട്ടു വിക്കറ്റ് നഷ്ടത്തില്‍ 235 റണ്‍സെടുത്തു ലക്ഷ്യം കണ്ടു.
ഗുര്‍വീന്ദര്‍ സിങ് (61) ത്രിപുരയുടെ ടോപ് സ്‌കോററായി. ബിശാല്‍ ഘോഷ്, സ്മിത് പട്ടേല്‍, സഞ്ജയ് മജുംദാര്‍ എന്നിവര്‍ 30 വീതം റണ്‍സെടുത്തു. കേരളത്തിനായി സന്ദീപ് വാര്യര്‍, കൃഷ്ണ കുമാര്‍, ജലജ് സക്‌സേന എന്നിവര്‍ രണ്ടു വീതം വിക്കറ്റുകളും വിനോദ് കുമാര്‍, ഇഖ്ബാല്‍ അബ്ദുല്ല എന്നിവര്‍ ഓരോ വിക്കറ്റും വീഴ്ത്തി.
നേരത്തെ പുറത്താകാതെ 82 റണ്‍സെടുത്ത സല്‍മാന്‍ നിസാറിന്റേയും 77 റണ്‍സെടുത്ത നായകന്‍ സച്ചിന്‍ ബേബിയുടേയും അവസരോചിത ബാറ്റിങാണു കേരളത്തിനു പൊരുതാവുന്ന സ്‌കോര്‍ സമ്മാനിച്ചത്.
60 റണ്‍സെടുക്കുന്നതിനിടെ അഞ്ചു വിക്കറ്റുകള്‍ നഷ്ടമായി കേരളം പരുങ്ങുമ്പോഴാണു ഇരുവരും ക്രീസില്‍ ഒരുമിച്ചത്. ത്രിപുര നിരയില്‍ അഭിജിത് സര്‍കാര്‍ മൂന്നും അജോയ് സര്‍കാര്‍ രണ്ടും വിക്കറ്റുകള്‍ പിഴുതു.