മ്യൂണിക്ക്: പരിശീലകനെന്ന നിലയില്‍ 1000ാം മത്സരത്തിനിറങ്ങിയ കോച്ച് കാര്‍ലോസ് ആന്‍സലോട്ടിക്ക് ബയേണ്‍ മ്യൂണിക്ക് ഗോളുകളുടെ ഉത്സവ കാഴ്ചയൊരുക്കി ഗുരു ദക്ഷിണ നല്‍കി. ജര്‍മന്‍ ബുണ്ടസ് ലീഗ പോരാട്ടത്തില്‍ സ്വന്തം മൈതാനത്തിറങ്ങിയ ബയേണ്‍ മറുപടിയില്ലാത്ത എട്ടു ഗോളുകള്‍ക്ക് ഹാംബര്‍ഗറിനെ തുരത്തി.
സൂപ്പര്‍ താരം റോബര്‍ട്ട് ലെവന്‍ഡോസ്‌കി ഹാട്രിക്ക് ഗോളുകള്‍ നേടിയപ്പോള്‍ കിങ്‌സ്‌ലി കോമന്‍ ഇരട്ട ഗോളുകളും സ്വന്തമാക്കി. ആര്‍ദുറോ വിദാല്‍, ഡേവിഡ് അലാബ, ആര്യന്‍ റോബന്‍ എന്നിവര്‍ ചേര്‍ന്നു പട്ടിക പൂര്‍ത്തിയാക്കി. മത്സരത്തിനു മുന്‍പ് ആന്‍സലോട്ടിയെ ആദരിച്ചു. ജയത്തോടെ പോയിന്റ് നേട്ടം 53ല്‍ എത്തിച്ച് ബയേണ്‍ മുന്നേറുന്നു.
മറ്റു മത്സരങ്ങളില്‍ രണ്ടാം സ്ഥാനത്തുള്ള ലെയ്പ്‌സിഗ് 3-1നു കൊളോണിനേയും ബൊറൂസിയ ഡോര്‍ട്മുണ്ട് 3-0ത്തിനു ഫ്രീബര്‍ഗിനേയും പരാജയപ്പെടുത്തി.
വെര്‍ഡര്‍ ബ്രമന്‍ 2-1നു വോള്‍വ്‌സ്ബര്‍ഗിനെ വീഴ്ത്തിയപ്പോള്‍ മെയ്ന്‍സ്, ഓഗ്‌സ്ബര്‍ഗ് ടീമുകളും വിജയം കണ്ടു.
ചെല്‍സി മുന്നേറുന്നു
ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടങ്ങളില്‍ കരുത്തരായ ചെല്‍സി, എവര്‍ട്ടന്‍ ടീമുകള്‍ വിജയിച്ചു. ചെല്‍സി ഒന്നിനെതിരേ മൂന്നു ഗോളുകള്‍ക്ക് സ്വാന്‍സീ സിറ്റിയേയും എവര്‍ട്ടന്‍ 2-0ത്തിനു സണ്ടര്‍ലാന്‍ഡിനേയും കീഴടക്കി. മറ്റൊരു മത്സരത്തില്‍ ക്രിസ്റ്റല്‍ പാലസ് 1-0ത്തിനു മിഡ്ഡ്ല്‍സ്‌ബ്രോയെ പരാജയപ്പെടുത്തിയപ്പോള്‍ ഹള്‍ സിറ്റി- ബേണ്‍ലി മത്സരം 1-1നു സമനില.
ഫാബ്രിഗസ്, പെഡ്രോ, ഡിഗോ കോസ്റ്റ എന്നിവരാണു ചെല്‍സിയുടെ ഗോളുകള്‍ നേടിയത്. 63 പോയിന്റുകളുമായി ചെല്‍സി ഒന്നാം സ്ഥാനത്തു കുതിപ്പ് തുടരുന്നു. സെനഗല്‍ താരം ഇദ്രിസ ഗുയേ, റൊമേലു ലുകാകു എന്നിവരുടെ ഗോളുകളാണു എവര്‍ട്ടന് വിജയമൊരുക്കിയത്.