കാസര്‍കോട്: പതിനഞ്ചു വര്‍ഷത്തിനിടയില്‍ കാസര്‍കോട് നടന്ന കലാപങ്ങളിലും സാമുദായിക സംഘട്ടനങ്ങളിലും അക്രമസംഭവങ്ങളിലും ബി.ജെ.പി സംസ്ഥാന ജനറല്‍ സെക്രട്ടറി കെ സുരേന്ദ്രനുള്ള പങ്ക് അന്വേഷിക്കണമെന്ന് മുസ്്‌ലിം യൂത്ത് ലീഗ് ജില്ലാ പ്രസിഡന്റ് അഷ്‌റഫ് എടനീരും ജനറല്‍ സെക്രട്ടറി ടി.ഡി കബീറും ആവശ്യപ്പെട്ടു. സുരേന്ദ്രന്‍ കാസര്‍കോട് കേന്ദ്രീകരിച്ചു പ്രവര്‍ത്തനം തുടങ്ങിയതിനു ശേഷമാണ് ജില്ലയില്‍ ബി.ജെ.പി പ്രവര്‍ത്തകരുടെ നേതൃത്വത്തില്‍ അക്രമസംഭവങ്ങള്‍ വര്‍ധിച്ചത്. ഇതുശരി വെക്കുന്നതാണു സുരേന്ദ്രന്‍ കഴിഞ്ഞ ദിവസം മംഗളൂരുവില്‍ നടത്തിയ പ്രസംഗം.
തങ്ങള്‍ അടികൊടുക്കുകയും കൊലപാതകം നടത്തുകയും ചെയ്തു എന്നു പരസ്യമായി പ്രസംഗിക്കുക വഴി വീണ്ടും ഒരു കലാപത്തിനാണു കെ സുരേന്ദ്രന്‍ ആഹ്വാനം നല്‍കിയിരിക്കുന്നതെന്നും യൂത്ത് ലീഗ് ആരോപിച്ചു. നാട്ടില്‍ നിലനില്‍ക്കുന്ന സമാധാനാന്തരിക്ഷവും സാമുദായിക സൗഹാര്‍ദ്ദവും തകര്‍ക്കുന്ന ഇത്തരം നേതാക്കളെ കരുതിയിരിക്കണമെന്നും യൂത്ത് ലീഗ് നേതാക്കള്‍ ആവശ്യപ്പെട്ടു. ഇതു സംബന്ധിച്ച് കെ സുരേന്ദ്രനെതിരേ കേസെടുത്ത് അന്വേഷണം നടത്തണമെന്നാവശ്യപ്പെട്ട് യൂത്ത് ലീഗ് മുഖ്യമന്ത്രിക്കും ഡി.ജി.പിക്കും പരാതി നല്‍കി.