വാടാനപ്പള്ളി: തളിക്കുളം ഗ്രാമപഞ്ചായത്ത് പ്രസിഡന്റായി സി.പി.എം സ്വതന്ത്ര പി.ഐ സജിതയെ തിരഞ്ഞെടുത്തു.കഴിഞ്ഞ മൂന്ന് വര്‍ഷത്തിനിടെ മൂന്നാമത്തെ പ്രസിഡന്റായാണ് സജിത തിരഞ്ഞെടുക്കപ്പെടുന്നത്.
എന്നാല്‍ ഈ ഭരണ സമിതിയുടെ കാലാവധി കഴിയും വരെ സജിതയ്ക്ക് അധികാരത്തില്‍ തുടരാനാകും. ഗ്രാമപഞ്ചായത്തില്‍ എട്ടാം വാര്‍ഡിനെ പ്രതിനിധീകരിക്കുന്ന സജിത സി.പി.എമ്മിന്റെയും ആര്‍.എം.പി.ഐയുടെയും പിന്തുണയോടെയാണ് കഴിഞ്ഞ തെരഞ്ഞെടുപ്പില്‍ സ്വതന്ത്ര സ്ഥാനാര്‍ത്ഥിയായി മത്സരിച്ചത്.
ഇന്നലെ രാവിലെ നടന്ന തെരഞ്ഞെടുപ്പില്‍ അഞ്ചിനെതിരേ എട്ട് വോട്ടുകള്‍ക്ക് യു.ഡി.എഫിലെ കോണ്‍ഗ്രസ് സ്ഥാനാര്‍ഥി എ.ടി നേയെയാണ് സജിത പരാജയപ്പെടുത്തിയത്. ബി.ജെ.പി, ആര്‍.എം.പി.ഐ അംഗങ്ങള്‍ വോട്ടെടുപ്പില്‍ പങ്കെടുത്തില്ല.
എല്‍.ഡി.എഫ് ധാരണ പ്രകാരം സി.പി.ഐയിലെ സന്ധ്യാ രാമകൃഷ്ണന്‍ ഒരു വര്‍ഷ കാലാവധി കഴിഞ്ഞ് രാജിവച്ച ഒഴിവിലേക്കാണ് വീണ്ടും തെരഞ്ഞെടുപ്പ് വേണ്ടി വന്നത്.
നേരത്തെ സി.പി.എമ്മിലെ കെ.കെ രജനിയായിരുന്നു രണ്ട് വര്‍ഷം പ്രസിഡന്റ്. തളിക്കുളം കൃഷി അസി.ഡയരക്ടര്‍ ജോഷി ജോസഫ് വര്‍ഗീസ് തെരഞ്ഞെടുപ്പ് നടപടികള്‍ നിയന്ത്രിച്ചു.