പാപ്പിനിശ്ശേരി: 'റോഡ് സുരക്ഷ, ജീവന്‍ സുരക്ഷ' എന്ന പ്രമേയവുമായി വളപട്ടണം ജനമൈത്രി പൊലിസും പാപ്പിനിശ്ശേരി ഇ.എം.എസ് ഹയര്‍സെക്കന്‍ഡറി സ്‌കൂള്‍ എസ്.പി.സി യൂനിറ്റും ചേര്‍ന്ന് ട്രാഫിക് ബോധവല്‍ക്കരണ പരിപാടി സംഘടിപ്പിച്ചു. പാപ്പിനിശ്ശേരി പഞ്ചായത്ത് ഹാളില്‍ നടന്ന പരിപാടി ജില്ലാ പൊലിസ് മേധാവി ശിവവിക്രം ഐ.പിഎസ് ഉദ്ഘാടനം ചെയ്തു. വളപട്ടണം സി.ഐ ടി.കെ രത്‌നകുമാര്‍ അധ്യക്ഷനായി. പഞ്ചായത്ത് പ്രസിഡന്റ് കെ നാരായണന്‍ മുഖ്യാതിഥിയായി. പാപ്പിനിശ്ശേരി കമ്മ്യൂണിറ്റി പൊലിസ് ഓഫിസര്‍ എന്‍.പി ബിനീഷ്, വളപട്ടണം എസ്.ഐ ശ്രീജിത്ത് കൊടേരി, എ.എസ്.ഐ മഹീന്ദ്രന്‍ തുടങ്ങിയവര്‍ പങ്കെടുത്തു. സുരക്ഷിതമായ ഡ്രൈവിങ്ങിലൂടെ സുരക്ഷിതമായ ജീവിതത്തിന് റോഡിലും വാഹനമോടിക്കുമ്പോഴും സ്വീകരിക്കേണ്ട നിയമങ്ങളെക്കുറിച്ച് അഡ്വ.രചന ക്ലാസെടുത്തു. പാപ്പിനിശ്ശേരി ഇ.എം.എസ് ഹയര്‍സെക്കന്‍ഡറി സ്‌കൂളിലെ നൂറോളം എസ്.പി.സി കാഡറ്റുകള്‍ ക്ലാസില്‍ പങ്കെടുത്തു. തുടര്‍ന്ന് റോഡ് ഷോയും യാത്രക്കാര്‍ക്ക് മധുര വിതരണവും നടന്നു.