ബോവിക്കാനം: ഒട്ടേറെ പേരുടെ ആശ്രയിക്കുന്ന ടൗണിലെ പൊതു ശുചിമുറിയില്‍ വെള്ളമില്ലാത്തതു ജനത്തിനു ദുരിതമായി. ബോവിക്കാനം ടൗണിലെ മുളിയാര്‍ സി.എച്ച്.സിക്കു സമീപമുള്ള പൊതുശുചി മുറിയാണു മോട്ടോര്‍ തകരാറിനെ തുടര്‍ന്നു വെള്ളമില്ലാതെ അടച്ചിടേണ്ട അവസ്ഥയിലായത്. സമീപത്തെ കുഴല്‍ക്കിണറില്‍ നിന്നാണ് ഇവിടേക്കു വെള്ളം എടുത്തിരുന്നത്.
ഒരാഴ്ച മുമ്പ് ഈ കുഴല്‍ക്കിണറിലെ മോട്ടോര്‍ തകരാറിലായതോടെയാണ് വെള്ളമില്ലാതായത്. ഇപ്പോള്‍ ശുചിമുറിയില്‍ പോകുന്നവര്‍ തൊട്ടടുത്ത ഹോട്ടലുകളില്‍ നിന്നാണു വെള്ളം കൊണ്ടു പോകുന്നത്. വെള്ളമില്ലാത്തതിനാല്‍ ശുചിമുറി വൃത്തിയാക്കാതെ ദുര്‍ഗന്ധം പരക്കുന്നതായും പരാതിയുണ്ട്. ഏതാനും മാസം മുമ്പും വെള്ളമില്ലാത്തതിനാല്‍ ദിവസങ്ങളോളം ശുചിമുറി അടച്ചിട്ടിരുന്നു.
വിവിധ ആവശ്യങ്ങള്‍ക്കായി ടൗണിലെത്തുന്നവര്‍ക്കും പുറമെ നിന്നു സി.എച്ച്.സിയില്‍ എത്തുന്ന രോഗികള്‍ ഉള്‍പ്പെടെയുള്ളവര്‍ക്കും പ്രാഥമിക കൃത്യം നിര്‍വഹിക്കാനുള്ള ഏക സ്ഥലമാണ് ഇത്.
അതേ സമയം മോട്ടോര്‍ തകരാര്‍ പരിഹരിച്ചു ശുചിമുറിയില്‍ വെള്ളമെത്തിക്കാനുള്ള നടപടി ഉടന്‍ സ്വീകരിക്കുമെന്ന് പഞ്ചായത്ത് അധികൃതര്‍ പറഞ്ഞു.