കോഴിക്കോട്: മിഠായിത്തെരുവില്‍ തീപിടിത്തം നിത്യസംഭവമാകുന്ന പശ്ചാത്തലത്തില്‍ സുരക്ഷാ സംവിധാനങ്ങള്‍ കര്‍ശനമാക്കുവാന്‍ കലക്ടറേറ്റില്‍ ചേര്‍ന്ന ജനപ്രതിനിധികളുടേയും വ്യാപാരി സംഘടനാ പ്രതിനിധികളുടേയും യോഗം തീരുമാനിച്ചു.
തീപിടിത്തം ആവര്‍ത്തിക്കാതിരിക്കാന്‍ നഗരസഭ ശക്തമായി ഇടപെടണമെന്നും ഇതിന് സര്‍ക്കാരില്‍നിന്നു എല്ലാവിധ പിന്തുണയുമുണ്ടാകുമെന്നും ജില്ലയുടെ ചുമതലയുളള തൊഴില്‍-എക്‌സൈസ് മന്ത്രി ടി.പി രാമകൃഷ്ണന്‍ പറഞ്ഞു. മേയര്‍ തോട്ടത്തില്‍ രവീന്ദ്രന്റെ അദ്ധ്യക്ഷതയില്‍ ചേര്‍ന്ന യോഗത്തില്‍ എം.എല്‍.എ മാരായ എ. പ്രദീപ്കുമാര്‍, വി.കെ.സി മമ്മദ്‌കോയ, ഡോ.എം.കെ മുനീര്‍, ജില്ലാ കലക്ടര്‍ യു.വി ജോസ് പങ്കെടുത്തു.
മൂന്നാഴ്ചക്കകം മിഠായിത്തെരുവിലെ കടകളിലെ വയറിങ്ങുകള്‍ നവീകരിക്കുമെന്ന് വ്യാപാരി സംഘടനാ പ്രതിനിധികള്‍ അറിയിച്ചു.
മാര്‍ച്ച് 25നകം അനുമതി തേടുകയും, അനുമതി തേടാത്തവര്‍ക്കെതിരേ നിയമ നടപടി സ്വീകരിക്കുമെന്നും കലക്ടര്‍ പറഞ്ഞു. വൈദ്യുത ലൈന്‍ ഭൂഗര്‍ഭ മാര്‍ഗത്തിലേക്ക് മാറ്റുന്നതിനുള്ള നടപടി ദ്രുതഗതിയില്‍ പൂര്‍ത്തീകരിക്കും. കെ.എസ്.ഇ.ബിയോട് ഇതിനാവശ്യമായ ഫണ്ടുകളുടെ ആദ്യ രൂപരേഖ സമര്‍പ്പിക്കാന്‍ ആവശ്യപ്പെട്ടിട്ടുണ്ട്.
കഴിഞ്ഞ ദിവസം ഉണ്ടായ സംഭവത്തിന്റെ കാരണം ഫോറന്‍സിക് വിഭാഗത്തിന്റെ റിപ്പോര്‍ട് ലഭിച്ചതിന് ശേഷമേ പ്രതികരിക്കൂ എന്നും കലക്ടര്‍ കൂട്ടിച്ചേര്‍ത്തു. നിരന്തരം ഉണ്ടാവുന്ന തീപിടിത്തത്തിന്റെ പശ്ചാത്തലത്തില്‍ കോര്‍പറേഷന്‍, ഫയര്‍ വിഭാഗം, ഇലക്ട്രിക്കല്‍ ഡിപ്പാര്‍ട്‌മെന്റ്, പൊലിസ്, ടൗണ്‍ പ്ലാനിങ് കമ്മിറ്റി എന്നിവര്‍ സംയുക്തമായി പരിശോധന നടത്തുമെന്ന് മേയര്‍ തോട്ടത്തില്‍ രവീന്ദ്രന്‍ പറഞ്ഞു.
തീപ്പിടിത്തം ആവര്‍ത്തിക്കാതിരിക്കാനുള്ള നടപടിയുടെ ഭാഗമായി ഈ മാസം 28ന് വ്യാപാരികള്‍ക്കായി ടാഗോര്‍ ഹാളില്‍ ബോധവത്കരണ ക്ലാസ് സംഘടിപ്പിക്കും. തെരുവിലെ മാലിന്യങ്ങള്‍ നീക്കംചെയ്യാനുള്ള നടപടികള്‍ സ്വീകരിക്കുമെന്നും, നിലവിലുള്ള മാലിന്യങ്ങള്‍ നീക്കംചെയ്യാന്‍ ക്ലീന്‍ ഓപ്പറേഷന്‍ നടത്തുമെന്നും അദ്ദേഹം കൂട്ടിച്ചേര്‍ത്തു.
മിഠായിത്തെരുവിലെ കടകള്‍ പലതും ഉടമകള്‍ മേല്‍ വാടകയ്ക്ക് നല്‍കുന്ന രീതിയാണ് നിലവിലുളളതെന്നും ലൈസന്‍സ് സംബന്ധിച്ച് കൃത്യമായ പരിശോധന നടത്തി നിയമവിരുദ്ധമായി പ്രവര്‍ത്തിക്കുന്ന കടകള്‍ ഒഴിപ്പിക്കാന്‍ കോര്‍പറേഷന്‍ തയാറാവണമെന്നും വി.കെ.സി മമ്മദ്‌കോയ എം.എല്‍.എ പറഞ്ഞു.
മിക്ക കടകളിലെ വയറിങ്ങിലേയും മേല്‍ക്കൂരകളുടെ നിര്‍മാണത്തിലേയും അപാകതകള്‍ അപകടങ്ങള്‍ ക്ഷണിച്ചുവരുത്തുന്ന രീതിയിലാണെന്നും തീപിടിത്തതിന് സാധ്യതയുണ്ടാകുന്ന ഡെക്കറേഷനുകള്‍ വ്യാപാരികള്‍ ഒഴിവാക്കണമെന്നും എ. പ്രദീപ്കുമാര്‍ എം.എല്‍.എ പറഞ്ഞു.
തീപിടിത്തം ആവര്‍ത്തന സംഭവങ്ങളാവുന്ന സാഹചര്യത്തില്‍ ഫയര്‍ ഫോഴ്‌സിനെ എല്ലാവിധ ഉപകരണങ്ങളോടേയും സുസജ്ജമാക്കുന്നതിന് നടപടിയുണ്ടാവണമെന്ന് എം.കെ മുനീര്‍ എം.എല്‍.എ പറഞ്ഞു. ജില്ലാ ഫയര്‍ ഓഫീസര്‍ അരുണ്‍ ഭാസ്‌കറിനെ യോഗം അഭിനന്ദിച്ചു.
കോര്‍പ്പറേഷന്‍ സെക്രട്ടറി മൃണ്‍മയി ജോഷി, അസി. കലക്ടര്‍ കെ. ഇമ്പശേഖര്‍, ഡെപ്യൂട്ടി കലക്ടര്‍ ബി. അബ്ദുള്‍ നാസര്‍, അസി. കമ്മിഷണര്‍ അബ്ദുള്‍ റസാഖ്, വ്യാപാരി സംഘടനാ പ്രതിനിധികള്‍ പങ്കെടുത്തു.