കല്‍പറ്റ: വയനാട് പ്രീമിയര്‍ ലീഗ് മത്സരത്തില്‍ ഇഞ്ചോടിഞ്ച് പോരാടി കരുത്തരായ ടീമുകള്‍. ഓക്‌സ്‌ഫോര്‍ഡ് എഫ്.സിയും യുവന്റസ് മേപ്പാടിയും തമ്മില്‍ ഇന്നലെ നടന്ന മത്സരത്തില്‍ ഇരുടീമുകള്‍ക്കും നന്നായിതന്നെ സ്‌കോര്‍ ചെയ്യാന്‍ സാധിച്ചു. എന്നാല്‍ ക്വാര്‍ട്ടര്‍ ഫൈനലിലേക്ക് കാലുറപ്പിക്കാനായി പൊരുതി കളിച്ച ഓക്‌സ്‌ഫോര്‍ഡ് എഫ്.സിക്കൊപ്പമായിരുന്നു വിജയം. കളിയില്‍ ഓക്‌സ്‌ഫോര്‍ഡ് എഫ്.സിയുടെ കരുത്തനായ കളിക്കാരന്‍ ആസിഫിന്റെ ഹാട്രിക് സഹായത്തിനെത്തിയപ്പോള്‍ വയനാട് പ്രീമിയര്‍ ലീഗില്‍ ഓക്‌സ്‌ഫോര്‍ഡ് എഫ്.സി 5-3ന് യുവന്റസ് മേപ്പാടിയെ പരാജയപ്പെടുത്തി. ഇതോടെ ഗ്രൂപ് 'ബി'യില്‍നിന്ന് ഓക്‌ഫോര്‍ഡ് ക്വാര്‍ട്ടര്‍ ഫൈനലില്‍ ഇടമുറപ്പിച്ചു. ഇരുഭാഗത്തേക്കും പന്ത് മാറിമാറി കയറിയിറങ്ങിയ മത്സരത്തില്‍ കളി ചൂടുംപിടിക്കുംമുന്‍പ് തന്നെ ബെന്നിയിലൂടെ അഞ്ചാം മിനിറ്റില്‍ ഓക്‌സ്‌ഫോര്‍ഡ് മുന്നിലെത്തി. യുവന്റസ് 14ാം മിനിറ്റില്‍ സര്‍ഫാജിലൂടെ ഒപ്പം പിടിച്ചു. 23-ാം മിനിറ്റില്‍ ബെന്നി വീണ്ടും ഓക്‌സ്‌ഫോര്‍ഡിനുവേണ്ടി ലക്ഷ്യം കണ്ടു. 26-ാം മിനിറ്റില്‍ ഒന്നാന്തരം ലോങ് റേഞ്ചറിലൂടെ ഷഫീര്‍ യുവന്റസിനെ വീണ്ടും ഒപ്പമെത്തിച്ചു. പിന്നീട് 37-ാം മിനിറ്റില്‍ ആദ്യഗോള്‍ കുറിച്ച ആസിഫ് 44-ാം മിനിറ്റില്‍ ബ്രോയുടെ പാസില്‍ എതിര്‍പ്രതിരോധത്തെ കബളിപ്പിച്ച് വീണ്ടും വല കുലുക്കി. 45-ാം മിനിറ്റില്‍ കിടിലന്‍ ഷോട്ടിലൂടെയായിരുന്നു ഹാട്രിക് ഗോള്‍. യുവന്റസ് നിരയില്‍ ആസിഫിന്റെ വകയായിരുന്നു അന്ത്യഘട്ടത്തിലെ മൂന്നാംഗോള്‍.