കൊച്ചി: ഇന്ത്യയില്‍ നിന്ന് ആന്‍ഡമാനിലേക്ക് ഇനി ഏത് കാലാവസ്ഥയിലും കടല്‍വഴി യാത്ര ചെയ്യാന്‍ കപ്പല്‍ ഒരുങ്ങുന്നു. ആന്‍ഡമാന്‍ നിക്കോബാര്‍ അഡ്മിനിസ്‌ട്രേഷന് വേണ്ടി കൊച്ചി കപ്പല്‍ശാല നിര്‍മിച്ച യാത്രാ-ചരക്കു കപ്പല്‍ ഇന്നലെ നീറ്റിലിറക്കി.
1200 പേര്‍ക്ക് യാത്ര ചെയ്യാനാകുന്ന കപ്പലിന് 1000 ടണ്‍ ഭാരശേഷിയുമുണ്ട്. സ്റ്റീലില്‍ നിര്‍മിതമായ അത്യാധുനിക കപ്പല്‍ മനോഹരമായ രൂപകല്‍പ്പനയിലാണ് ഒരുക്കിയിരിക്കുന്നത്. സുരക്ഷിതവും സുഖകരവുമായ യാത്ര ഒരുക്കുന്ന കപ്പല്‍ വിനോദസഞ്ചാര മേഖലക്കും മുതല്‍ക്കൂട്ടാകും. കഫറ്റേറിയ , റിക്രിയേഷന്‍ മുറികള്‍, വിവിധ ക്ലാസുകളിലുള്ള ക്യാബിനുകള്‍ തുടങ്ങിയ സൗകര്യങ്ങള്‍ യാത്രക്കാര്‍ക്കായി ഒരുക്കുന്നുണ്ട്.157 മീറ്റര്‍ നീളമുള്ള കപ്പല്‍ 18 നോട്ടിക്കല്‍ മൈല്‍ വേഗത്തില്‍ സഞ്ചരിക്കും. 104 ജീവനക്കാരുണ്ടാകും. ഉപകരണങ്ങള്‍ ഘടിപ്പിക്കുന്നതിനും താമസസൗകര്യങ്ങളൊരുക്കുന്നതിനുമുള്ള നടപടികളാണ് ഇനി പൂര്‍ത്തിയാവാനുള്ളത്. തുടര്‍ന്ന് ടെസ്റ്റിങ്ങിനും ട്രയല്‍ സഞ്ചാരത്തിനും ശേഷം ആന്‍ഡമാന്‍ നിക്കോബാര്‍ അഡ്മിനിസ്‌ട്രേഷന് കൈമാറും.
ആന്‍ഡമാന് വേണ്ടി നിര്‍മിക്കുന്ന നാല് കപ്പലുകളില്‍ ആദ്യത്തേതാണ് ഇന്നലെ നീറ്റിലിറക്കിയത്. ആന്‍ഡമാനിലെ വിവിധ ദ്വീപുകള്‍ക്കിടയിലുള്ള യാത്രക്കായി 500 യാത്രക്കാരെ കൊള്ളുന്ന 150 ടണ്‍ ഭാരശേഷിയുള്ള രണ്ട് കപ്പലുകളും 1200 യാത്രക്കാര്‍ക്ക് സഞ്ചരിക്കാവുന്ന 1000 ടണ്‍ ഭാരശേഷിയുമുള്ള ഒരു കപ്പലും ആന്‍ഡമാന്‍ അഡ്മിനിസ്‌ട്രേഷന് വേണ്ടി കൊച്ചി കപ്പല്‍ശാലയില്‍ നിര്‍മാണത്തിലാണ്. ഇതില്‍ 500 പേര്‍ക്ക് യാത്ര ചെയ്യാനാവുന്ന രണ്ട് കപ്പലുകളിലൊന്ന് മാര്‍ച്ചിലും രണ്ടാമത്തേത് ജൂണിലും ആന്‍ഡമാന്‍ അഡ്മിനിസ്‌ട്രേഷന് കൈമാറും.
കൊച്ചി കപ്പല്‍ ശാല അങ്കണത്തില്‍ നടന്ന ചടങ്ങില്‍ കപ്പല്‍ശാല സി.എം.ഡി മധു.എസ്.നായരുടെ ഭാര്യയും എന്‍.പി.ഒ.എല്‍ ശാസ്ത്രജ്ഞയുമായ റമീത.കെ കപ്പല്‍ നീറ്റിലിറക്കി. സി.എം.ഡി മധു.എസ്.നായര്‍, കപ്പല്‍ശാല ഓപ്പറേഷന്‍സ് ഡയരക്ടര്‍ സുരേഷ് ബാബു എന്‍.വി , സാങ്കേതിക വിഭാഗം ഡയരക്ടര്‍ ബിജോയി ഭാസ്‌കര്‍ , സാമ്പത്തിക വിഭാഗം ഡയരക്ടര്‍ ജോസ്.വി.ജെ തുടങ്ങിയവര്‍ പങ്കെടുത്തു.