കുമ്പള: രാത്രി കാലങ്ങളില്‍ ഉണ്ടാകുന്ന വാഹനാപകടങ്ങളിലും കാലവര്‍ഷക്കെടുതി തുടങ്ങിയ അപകടങ്ങളിലും ദുരന്തനിവാരണസേന വെളിച്ചം കിട്ടാന്‍ ഉപയോഗിക്കുന്ന അലാസ്‌ക വെളിച്ച സംവിധാനം കുമ്പള പൊലിസ് സ്റ്റേഷനിലും സജ്ജമായി.
പെട്രോളുപയോഗിച്ചു പ്രവര്‍ത്തിപ്പിക്കാവുന്ന  ജനറേറ്ററും വായു നിറച്ചു തൂണുപോലെ നിര്‍ത്താവുന്ന എയര്‍ ബ്ലോറുമാണ് ഇതിന്റെ പ്രധാന ഭാഗങ്ങള്‍. എയര്‍ ബ്ലോറിന്റെ അറ്റത്ത് ഒരു ബള്‍ബ് ഘടിപ്പിക്കുകയും അകം ഫ്‌ളൂറസന്റ് പദാര്‍ഥങ്ങളെക്കൊണ്ട് പൂശുകയും ചെയ്തിട്ടുണ്ട്.
വൈദ്യുതി ലഭിക്കുന്ന പ്രദേശത്താണെങ്കില്‍ വൈദ്യുതിയുപയോഗിച്ചും പ്രവര്‍ത്തിപ്പിക്കാവുന്നതാണിത്. മഞ്ഞിലും മഴയത്തും ഒരുപോലെ പ്രവര്‍ത്തിപ്പിക്കാന്‍ കഴിയുന്ന യന്ത്രത്തില്‍ നല്ല വെളിച്ചവും കിട്ടും.
കുമ്പള പൊലിസ്  സ്റ്റേഷനു പുറമെ  ജില്ലയില്‍ വെള്ളരിക്കുണ്ട്, നീലേശ്വരം, ചിറ്റാരിക്കല്‍, കാഞ്ഞങ്ങാട,് കാസര്‍കോട് എ.ആര്‍ ക്യാംപ് എന്നിവിടങ്ങളിലും ഈ സംവിധാനം നിലവില്‍ വന്നിട്ടുള്ളതായി ഉദ്യോഗസ്ഥര്‍ അറിയിച്ചു.
വാതക ചോര്‍ച്ച പോലുള്ള അപകട സ്ഥലങ്ങളില്‍ നിര്‍ദ്ദിഷ്ട  ദൂരപരിധിയിലും ഈ സംവിധാനം ഉപയോഗിക്കാമെന്ന് ബന്ധപ്പെട്ട ഉദ്യോഗസ്ഥര്‍ പറഞ്ഞു.