സ്വന്തം ലേഖകന്‍
തിരുവനന്തപുരം: മനുഷ്യമഹാശൃംഖല ഒന്നിച്ചുള്ള സമരമല്ലെന്നും ഇതിനുപിന്നില്‍ രാഷ്ട്രീയ ലക്ഷ്യമാണെന്നും പ്രതിപക്ഷ ഉപനേതാവ് എം.കെ മുനീര്‍. ഒന്നിച്ചുള്ള സമരം എ.കെ.ജി സെന്ററില്‍ അല്ല തീരുമാനിക്കുന്നത്. അതുവേണമെങ്കില്‍ മുഖ്യമന്ത്രി ക്ഷണിക്കണമായിരുന്നു. ഒന്നിച്ചുള്ള സമരത്തിന്റെ കടയ്ക്കല്‍ കത്തിവച്ചത് പിണറായി വിജയനാണ്. സി.പി.എം രാഷ്ട്രീയമാണ് കളിക്കുന്നതെന്നും എന്നാല്‍, തങ്ങള്‍ക്കിത് ജീവന്‍ മരണപോരാട്ടമാണെന്നും മുനീര്‍ പറഞ്ഞു. ആദ്യത്തെ ഒന്നിച്ചുള്ള സമരം തീരുമാനിച്ചത് പ്രതിപക്ഷമാണ്. ഒന്നിച്ച് പ്രമേയം നല്‍കാമെന്നും കേസിനുപോകാമെന്നും പറഞ്ഞത് പ്രതിപക്ഷമാണ്. ഞങ്ങള്‍ പറഞ്ഞ കാര്യങ്ങള്‍ അവര്‍ ചെയ്യുകയും പ്രതിപക്ഷം ഇപ്പോള്‍ പുറത്തും എന്നതാണ് അവസ്ഥയെന്നും മുനീര്‍ തിരുവനന്തപുരത്ത് പറഞ്ഞു.
ഒന്നിച്ചുള്ള സമരത്തിന്റെ കാര്യത്തില്‍ ഞങ്ങള്‍ തമ്പ്രാക്കന്‍മാരും നിങ്ങള്‍ അടിയാന്മാരുമെന്ന സി.പി.എം രീതി ശരിയല്ല. അവര്‍ വിളിക്കുന്ന ജാഥയിലൊക്കെ നമ്മള്‍ ചെന്നുനില്‍ക്കണമെന്ന നിലപാട് ശരിയല്ല. നമ്മള്‍ വിളിക്കുന്ന ജാഥയിലും അവര്‍ വന്നുനില്‍ക്കണം. ഞാന്‍ കോഴിക്കോട്ട് നടത്തിയ ഉപവാസത്തില്‍ മൂന്നു സി.പി.എം എം.എല്‍.എമാരെ വിളിച്ചു. അവര്‍ വന്നില്ല. ഒരു പാലമിട്ടാല്‍ അങ്ങോട്ടും ഇങ്ങോട്ടും വേണം. ഇടതുപക്ഷം മാത്രമാണ് ഇവിടത്തെ സമരത്തിന്റെ കുത്തക എന്ന മട്ടാണ്. ഈ സമരം എല്ലാവരും കൂടി നടത്തുന്നതാണ്. ആ ബോധ്യം ആദ്യം ഉണ്ടാകേണ്ടത് ഇടതുപക്ഷത്തിനാണ്.
വ്യക്തികള്‍ എന്ന നിലയില്‍ ലീഗ് പ്രവര്‍ത്തകര്‍ എല്‍.ഡി.എഫ് മനുഷ്യ ചങ്ങലയില്‍ പങ്കെടുത്തതില്‍ തെറ്റില്ല. മത സംഘടനയിലും പാര്‍ട്ടിയിലും അംഗത്വമുള്ളവര്‍ സംഘടനയുടെ പേരില്‍ പങ്കെടുത്തിട്ടുണ്ടാകാം. ഇപ്പോള്‍ സസ്‌പെന്‍ഷനിലായ കെ.എം ബഷീര്‍ ചങ്ങലയില്‍ പങ്കെടുത്തതിനുപുറമേ പാര്‍ട്ടി അച്ചടക്കം ലംഘിക്കുന്ന രീതിയില്‍ സംസാരിക്കുകയും ചെയ്തു. അത് അംഗീകരിക്കാന്‍ കഴിയില്ല. ഇക്കാര്യത്തില്‍ പാര്‍ട്ടിയില്‍ ഭിന്നാഭിപ്രായമില്ലെന്നും ഇതുസംബന്ധിച്ച ചോദ്യങ്ങള്‍ക്ക് മുനീര്‍ മറുപടി പറഞ്ഞു.