ഫൈസാബാദ്: ജാമിഅ നൂരിയ്യ വാര്‍ഷിക സനദ് ദാന സമ്മേളനം നാളെ സമാപിക്കും. വൈകിട്ട് ഏഴിനു സമ്മേളനം ഇന്റര്‍നാഷനല്‍ യൂനിയന്‍ ഓഫ് യൂനിവേഴ്‌സിറ്റീസ് പ്രസിഡന്റ് ഡോ.മുഹമ്മദ് ഖൈര്‍ ഗബ്ബാനി അല്‍ ഹുസൈനി (സിറിയ) ഉദ്ഘാടനം ചെയ്യും. പാണക്കാട് സയ്യിദ് ഹൈദരലി ശിഹാബ് തങ്ങള്‍ സനദ്ദാനം നിര്‍വഹിക്കും.

സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ മുഖ്യപ്രഭാഷണവും സമസ്ത ജന. സെക്രട്ടറി കെ. ആലിക്കുട്ടി മുസ്‌ലിയാര്‍ സനദ്ദാന പ്രസംഗവും നടത്തും. ബ്രൂണെ ഹൈക്കമ്മിഷണര്‍ ഹാജി സിദ്ദീഖലി, ഡല്‍ഹി ഉപമുഖ്യമന്ത്രി മനീഷ് സിസോദിയ, കര്‍ണാടക വഖ്ഫ്,ന്യൂനപക്ഷ വകുപ്പ് മന്ത്രി സമീര്‍ അഹ്മദ് ഖാന്‍ അതിഥികളാകും. സമസ്ത വിദ്യാഭ്യാസ ബോര്‍ഡ് പ്രസിഡന്റ് പി.കെ.പി അബ്ദുസലാം മുസ്‌ലിയാര്‍, ജന. സെക്രട്ടറി എം.ടി അബ്ദുല്ല മുസ്‌ലിയാര്‍, സമസ്ത ട്രഷറര്‍ സി.കെ.എം സ്വാദിഖ് മുസ്‌ലിയാര്‍, പി.കെ കുഞ്ഞാലിക്കുട്ടി എം.പി, എം.പി അബ്ദുസമദ് സമദാനി, അബ്ദുസമദ് പൂക്കോട്ടൂര്‍, അബ്ദുല്‍ ഹമീദ് ഫൈസി അമ്പലക്കടവ് സംസാരിക്കും. സയ്യിദ് സാദിഖലി ശിഹാബ് തങ്ങള്‍ സ്വാഗതവും വി. മോയിമോന്‍ ഹാജി നന്ദിയും പറയും.

വൈകിട്ട് അഞ്ചിന് സമ്മേളനത്തിനു മുന്നോടിയായി മൗലിദ് പാരായണം നടക്കും. രാവിലെ ടീന്‍സ് മീറ്റ് അഡ്വ. ജാബിര്‍ അന്‍സി ഉദ്ഘാടനം ചെയ്യും.
സയ്യിദ് റശീദലി ശിഹാബ് തങ്ങള്‍ അധ്യക്ഷനാകും. നാഷനല്‍ മിഷന്‍ കോണ്‍ഫറന്‍സ് സമസ്ത സെക്രട്ടറി കൊയ്യോട് ഉമര്‍ മുസ്‌ലിയാര്‍, ശരീഅത്ത് സമ്മേളനം മാണിയൂര്‍ അഹ്മദ് മുസ്‌ലിയാര്‍ എന്നിവര്‍ ഉദ്ഘാടനം ചെയ്യും.