വാഷിങ്ടണ്‍: അഫ്ഗാനിസ്ഥാനില്‍ താലിബാന്‍ കേന്ദ്രമായ പര്‍വതമേഖലയില്‍ യു.എസ് യുദ്ധവിമാനം തകര്‍ന്നുവീണത് സ്ഥിരീകരിച്ച് പെന്റഗണ്‍. അതേസമയം, വിമാനം താലിബാന്‍ വെടിവച്ചുവീഴ്ത്തിയതാണെന്ന ആരോപണം അഫ്ഗാനിലെ യു.എസ് സേനാ വക്താവ് കേണല്‍ സണ്ണി ലെജെറ്റ് തള്ളി.
തകര്‍ന്നത് ഇ 11 എ എന്ന യു.എസ് ബോംബാര്‍ഡിയര്‍ ജെറ്റ് വിമാനമാണെന്ന് അദ്ദേഹം പറഞ്ഞു. വിമാനം തകരാനുണ്ടായ കാരണം അന്വേഷിച്ചുവരുകയാണെന്നും ശത്രു വെടിവച്ചിട്ടതാണെന്നു തെളിയിക്കുന്ന സൂചനകളൊന്നുമില്ലെന്നും അദ്ദേഹം പറഞ്ഞു. എന്നാല്‍, അപകടത്തില്‍ ആളപായമുണ്ടായോയെന്ന് അദ്ദേഹം വ്യക്തമാക്കിയില്ല. അതേസമയം, വിമാനം തങ്ങള്‍ വെടിവച്ചിട്ടതാണെന്നു പറഞ്ഞ താലിബാന്‍ ഒരാള്‍പോലും രക്ഷപ്പെട്ടിട്ടില്ലെന്നു പറഞ്ഞിരുന്നു. തകര്‍ന്ന വിമാനത്തിന്റെ അവശിഷ്ടങ്ങള്‍ക്കിടയില്‍ ആളുകള്‍ സംസാരിച്ചുകൊണ്ടിരിക്കുന്ന വിഡിയോയും താലിബാന്‍ പുറത്തുവിട്ടിരുന്നു.