പൂക്കോട്ടുംപാടം: ടി.കെ കോളനിയില്‍ വീണ്ടും തീപിടിത്തം. വനത്തിനോടു ചേര്‍ന്നുകിടക്കുന്ന റബര്‍ എസ്റ്റേറ്റിനാണ് തീപിടിച്ചത്. മൂന്ന് ഏക്കറോളം സ്ഥലത്തെ റബര്‍ കത്തി നശിച്ചു. വനത്തിനകത്തേക്ക് പടര്‍ന്ന തീ അണയ്ക്കാന്‍ കഴിഞ്ഞിട്ടില്ല.
വനപാലകര്‍ ശനിയാഴ്ച രാവിലെ ഫയര്‍ ലൈന്‍ ജോലികള്‍ നടത്തിയിരുന്നു. അതിലെ അശ്രദ്ധയാണ് തീ പടരാന്‍ കാരണമായതായി നാട്ടുകാര്‍ ആരോപിക്കുന്നത്. കഴിഞ്ഞ ആഴ്ചയിലും ടി.കെ കോളനിയില്‍ അഞ്ചേക്കറോളം റബര്‍ കത്തിനശിച്ചിരുന്നു. ചന്തക്കുന്ന് സ്വദേശി എറിയാട്ടുകുഴിയില്‍ സക്കീന, ടി.കെ കോളനി കറുത്താര്‍തൊടിക റുഖിയ, ആലാന്‍ അബ്ദുല്‍ഖാദര്‍ എന്നിവരുടെ റബറാണ് കത്തിനശിച്ചത്.